ಆಟಿ ತಿಂಗೊಲ್ದ ಇಸೇಸ ಕೂಟ

ಕೊಲ್ಯ: ಬ್ರಹ್ಮಶ್ರೀ ನಾರಾಯಣಗುರು ಧರ್ಮ ಶಿಕ್ಷಣ ಕೇಂದ್ರ ಕೊಲ್ಯದ ಮುತಾಲಿಕೆಡ್….  ಬ್ರಹ್ಮಶ್ರೀ ನಾರಾಯಣಗುರು ಧ್ಯಾನ ಮಂದಿರ ಕೊಲ್ಯ ಸೋಮೇಶ್ವರ ಬೊಕ್ಕ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುಗಾರ್ತೆದ ಯುವವಾಹಿನಿ (ರಿ.) ಕೊಲ್ಯ ಘಟಕದ ನಿರೆಲ್ಡ್ ….  ಆಟಿ ತಿಂಗೊಲ್ದ ಇಸೇಸ ಕೂಟ….

ಆಟಿ…..ಆಟಿ…..ಆಟಿ….
ಚೇವು , ಚೇಟ್ಲ, ಕನಿಲೆ
ಗುಂಡ, ಚಿಲಿಂಬಿ, ಕೊಟ್ಟಿಗೆದ
ಅರ್ತಿ ಪಿರ್ತಿದ ಭೇಟಿ….

ಉಡಲ್ ಸಂಪು ಮಲ್ತಿನ
ತುಳುವನಾಡ್ ದ ಕಮ್ಮೆನ
ಆಟಿ ಸೊಪ್ಪುದ ಚೀಯನ.

ಬಾನ ಭಾಸ್ಕರೆ ಬಚ್ಚೆಲರಪುನ ಪೊರ್ತು, ಪಿರಣಿ, ಪಕ್ಕಿಲು ಕಾರಿ ಸೇರುನ ಪೊರ್ತು, ಪೆತ್ತ ಕೈಕಂಜಿಲು ಕಿದೆತ ಅದೆತುಲಯಿ ಮದೆಯಾಪುನ ಪೊರ್ತು.. ತೇದಿ 30/7/2024 ನೇ ದಾನಿ ಬ್ರಹ್ಮಶ್ರೀ ನಾರಾಯಣಗುರು ಧರ್ಮ ಶಿಕ್ಷಣ ಕೇಂದ್ರೊ ಕೊಲ್ಯದ ಬೂಡುದುಲಯಿ,… ಸಂಸ್ಕಾರ, ಸಂಸ್ಕೃತಿದ ಉಲ ತಿರ್ಲ್ ನ್ ಕರಾವಳಿದ ಪೆರ್ಮೆದ ಕಲ್ಪಾದಿ, ವಾಗ್ಮಿ ಡಾ.ಅರುಣ್ ಉಳ್ಳಾಲ್ ಮೆರೆನ ಗೇನೊದ ಕಡಲ್ದ್ ಪಿರಿಯಕ್ಲು, ಕಿರಿಯಕ್ಲು, ಕಲ್ಪಾರ್ಥಿಲೆಗು ದಾರೆ ಮೈಪುನ ಬ್ರಹ್ಮಶ್ರೀ ನಾರಾಯಣಗುರು ಧ್ಯಾನ ಮಂದಿರ ಕೊಲ್ಯ ಸೋಮೇಶ್ವರ ಬೊಕ ಯುವವಾಹಿನಿ (ರಿ.) ಕೊಲ್ಯ ಘಟಕದ ನಿರೆಲ್ಡ್ ಆಟಿ ತಿಂಗೊಲ್ದ ಇಸೇಸ ಕೂಟ ಗೌಜಿ ಗದ್ದಲದಾಂತೆ ನಡತ್ಂಡ್.

ಬ್ರಹ್ಮಶ್ರೀ ನಾರಾಯಣ ಗುರು ಧರ್ಮ ಶಿಕ್ಷಣ ಕೇಂದ್ರದ ಕಲ್ಪಾದಿ ಡಾ.ಅರುಣ್ ಉಳ್ಳಾಲ್ ಆಟಿ ತಿಂಗೊಲ್ದ ಪೊಲಬೊದೊಟ್ಟಿಗೆ ಆಟಿ ಕಳೆಂಜನ ಪರಪೋಕುನು ಲೆತ್ತ್ ಕೊಂಡ್ಯಾಡಿಯೆರ್.

ಬ್ರಹ್ಮಶ್ರೀ ನಾರಾಯಣ ಗುರು ಧರ್ಮ ಶಿಕ್ಷಣ ಕೇಂದ್ರದ ಕಿನ್ಯ ಕಿನ್ಯ ಕಲ್ಪಾರ್ಥಿಲು ತುಳುವೆರೆ ಪದಿರಾಡ್ ತಿಂಗೊಲ್ದ ಪೊಲಬುನು ಭಾರೀ ಪೊರ್ಲುಡೆ ಪಂಡ್ ದ್ ಕೋಡಿ ಎತ್ತಾಯೆರು.

ಈ ಪೊರ್ತುಡು, ಆಟಿ ತಿಂಗೊಲ್ಡ್ ಮಲ್ಪುನ ಇಸೇಸ ತೆನಸ್ ಕನಿಲೆ ಬೊಕ ಕನಿಲೆ ಎಂಚ ಮಲ್ಪುನಿ ಪನ್ಪಿನ ಪೊಲಬುನ್ ಕೊಲ್ಯ ಘಟಕದ ಕಲೆ ಮತ್ತು ಸಾಹಿತ್ಯ ನಿರ್ದೇಶಕೆರ್ ಅಶ್ವಿತ ಹರೀಶ್ ಕುಂಪಲ ತೆರಿಪಾದ್ ಕೊರ್ದು , ಚೇವುದೊಟ್ಟಿಗೆ ಚೇಟ್ಲ ಕಟ್ಟುನ ರೀತಿನು ಪಂಡ್ ದ್ ತೋಜಾಯೆರ್.

ತಾರೆದ ಮಡಲ್ದ ಚೀಂಕ್ರ್ ನ್ ಗಳಸೊಂದು, ಪೆಲತ ಇರೆನ್ ನಾಲ್ ಮೂಲೆ ಬಂದ್ ಮಲ್ತ್ ದ್ ಗುಂಡ ಕಟ್ಟುನ ಪೊಲಬುನು, ಒಂಟಿ ಇರೆಟ್ ಚಿಲಿಂಬಿ ಕಟ್ಟುನ, ಬಾರೆದ ಇರೆಟ್ ಕೊಟ್ಟಿಗೆ ಕಟ್ಟುನ ಪೊಲಬುನು ಧರ್ಮ ಶಿಕ್ಷಣ ಕೇಂದ್ರ ಕೊಲ್ಯದ ಪಿರಿಯ ಸದಸ್ಯೆ ಕಲ್ಪಾದಿ ಸುಲೋಚನಿ.. ಜೋಕ್ಲೆಗ್ ಬೊಕ ಪಿರಿಯಕ್ಲೆಗ್ ಪಂಡ್ ದ್ ಕೊರಿಯೆರು.

ಕಲ್ಪಾದಿ ಗೀತಾ.ಕೆ. ಆಟಿ ಸೊಪ್ಪುದ ಪೊಲಬೊದೊಟ್ಟಿಗೆ, ಆಟಿ ಸೊಪ್ಪುದ ಚೀಯನೊನು ಕೊರ್ದು ಉಡಲ್ ಸಂಪು ಮಲ್ತೆರ್.

ಆಟಿ ಕಳೆಂಜನ ಸಂಧಿ ಪಾರ್ದನೊಗು ಸೊರೊ ಕೊರ್ದು ಗೀತಾ.ಕೆ, ನಳಿನಾಕ್ಷಿ, ಸುಧಾ ಸುರೇಶ್, ಜೀವನ್ ಕೊಲ್ಯ, ಧ್ಯಾನ್ ಕೊಲ್ಯ,ಆಟಿದ ಇಸೇಸ ಕೂಟೊಗು ಪೊರ್ಲು ದಿಂಜಾಯೆರ್.

ಬ್ರಹ್ಮಶ್ರೀ ನಾರಾಯಣ ಗುರು ಧರ್ಮ ಶಿಕ್ಷಣ ಕೇಂದ್ರದ ಕಲ್ಪಾದಿ ಡಾ.ಅರುಣ್ ಉಳ್ಳಾಲ್, ಬ್ರಹ್ಮಶ್ರೀ ನಾರಾಯಣಗುರು ಧ್ಯಾನ ಮಂದಿರದ ಭಜನಾ ಸಂಚಾಲಕೆರ್ ಯತೀಶ್ ವೆಂಕಹಿತ್ಲು, ಯುವವಾಹಿನಿ (ರಿ.) ಕೊಲ್ಯ ಘಟಕದ ಗುರ್ಕಾರ್ಲು ಸುಧಾ ಸುರೇಶ್, ಕಾರ್ಯಂತೆರ್ ಜಗಜೀವನ್ ಕೊಲ್ಯ, ಯುವವಾಹಿನಿ (ರಿ.) ಕೇಂದ್ರ ಸಮಿತಿದ ಸಂಘಟನಾ ಕಾರ್ಯಂತೆರ್ ಸುಂದರ್ ಸುವರ್ಣ, ಘಟಕದ ಮಾಜಿ ಗುರ್ಕಾರ್ಲು, ಪದುಕೆರ್ ಬೊಕ ಬ್ರಹ್ಮಶ್ರೀ ನಾರಾಯಣ ಗುರು ಧರ್ಮ ಶಿಕ್ಷಣ ಕೇಂದ್ರದ ಕಲ್ಪಾರ್ಥಿಲು, ಪಿರಿಯ ಸದಸ್ಯೆರ್ ನಕುಲೆನ ಒಟ್ಟು ಸೇರಿಗೆಡ್ ಆಟಿದ ಇಸೇಸ ಕೂಟೊ ಪೊಸ ದೇಕಿದ ರಂಗ್ ದಿಂಜಂಡ್.