ಮಂಗಳೂರು: ಯುವವಾಹಿನಿ(ರಿ.) ಸುರತ್ಕಲ್ ಘಟಕದ ವತಿಯಿಂದ ದಿನಾಂಕ 12-05-2024 ರಂದು ಭಾನುವಾರ ಒಂದು ದಿನದ ಕಿರು ಪ್ರವಾಸವನ್ನು ಬ್ರಹ್ಮವರದ ರಿಲ್ಯಾಕ್ಸ್ ಲೇಸರ್ ಪಾರ್ಕ್ ಗೆ ಹಮ್ಮಿಕೊಳ್ಳ ಲಾಗಿತ್ತು. ಬಿಡುವಿಲ್ಲದ ಜೀವನದಲ್ಲಿ ಸ್ವಲ್ಪ ಬಿಡುವು ಮಾಡಿಕೊಂಡು ರಿಲ್ಯಾಕ್ಸ್ ಲೇಸರ್ ಪಾರ್ಕಿನಲ್ಲಿ ರೋಮಾಂಚನಕಾರಿಯಾಗಿ ಸಮಯ ಕಳೆಯಲು, ಮುಂಜಾನೆ 6 ಗಂಟೆಗೆ ಸುರತ್ಕಲ್ ನಿಂದ ಬಸ್ಸು ತೆರಳಿತು. ಸದಸ್ಯರೆಲ್ಲರ ಪರಿಚಯದೊಂದಿಗೆ ಪ್ರಯಾಣ ಶುರು ಮಾಡಿ, ಮೊದಲಿಗೆ ಕಾಪು ಮಾರಿಯಮ್ಮ ದೇಗುಲ ದರ್ಶನದೊಂದಿಗೆ ಪಯಣ ಮುಂದುವರೆಸಿ, ಉಡುಪಿ ಕಡಿಯಾಳಿ ಶ್ರೀ ಮಹಿಷಮರ್ದಿನಿ ದೇವಸ್ಥಾನದಲ್ಲಿ ದೇವರ ದರ್ಶನ ಪಡೆದು, ಬೆಳಿಗ್ಗೆ ಸುಮಾರು 9.30 ಗಂಟೆಗೆ ಪ್ರವಾಸ ತಾಣ ತಲುಪಿದರು. ಬೆಳಗ್ಗಿನ ಉಪಾಹಾರ ಮುಗಿಸಿ, ದೋಣಿಯ ಮುಖಾಂತರ ರಿಲ್ಯಾಕ್ಸ್ ಲೇಸರ್ ಪಾರ್ಕ್ ತಲುಪಿದರು. ಅಲ್ಲಿಯ ಸಿಬ್ಬಂದಿಗಳು ಘಟಕದ ತಂಡವನ್ನು ಆದರದಿಂದ ಸ್ವಾಗತಿಸಿದರು. ಸದಸ್ಯರ ಎರಡು ತಂಡ ರಚಿಸಿ, ಚಿಕ್ಕ ಮಕ್ಕಳಂತೆ ತ್ರೋ ಬಾಲ್, ವಾಲಿಬಾಲ್, ಹಗ್ಗಜಗ್ಗಾಟ ಮತ್ತಿತರ ಆಟಗಳನ್ನು ಬಾಲ್ಯದ ನೆನಪು ಮರುಕಳಿಸುವಂತೆ ಆನಂದಿಸಿದರೂ.
ಮಧ್ಯಾಹ್ನ ಬಿರಿಯಾನಿ ಊಟ ಮುಗಿಸಿ, ಬೋಟಿನಲ್ಲಿ ಜಲಯಾನ ಮಾಡಿ ಮಧ್ಯಾಹ್ನದ ಮಟ ಮಟ ಬಿಸಿಲಿನಲ್ಲಿ ಜಲಕ್ರೀಡೆಯಾಡಿ ಮನಸ್ಸನ್ನು ಉಲ್ಲಾಸಗೊಳಿಸಿ, ನೀರಿನಲ್ಲಿ ತ್ರೋಬಾಲ್ ಬೋಟಿಂಗ್ ಇನ್ನಿತರ ಮನರಂಜನಾ ಆಟಗಳನ್ನು ಆಡಿ, ಡಿ.ಜೆ ಸಂಗೀತಕ್ಕೆ ಮನಬಿಚ್ಚಿ ಕುಣಿದು ಆನಂದಿಸಿದರು. ಸಂಜೆಯ ಬಿಸಿ ಬಿಸಿ ಚಾ ತಿಂಡಿಯನ್ನು ಮುಗಿಸಿ, ಬಸ್ಸಿನ ಕಡೆ ಮರಳಿದರು. ಬಸ್ಸಿನಲ್ಲಿ ಹಾಡಿಗೆ ಹೆಜ್ಜೆ ಹಾಕುತ್ತಾ ಕುಣಿದು, ರಾತ್ರಿ 7.30ಕ್ಕೆ ಸುರತ್ಕಲ್ ತಲುಪಿದರು. ಮತ್ತೆ ವಾಸ್ತವಕ್ಕೆ ಮರಳುವಾಗ ಅದೇ ಜೀವನದ ಜವಾಬ್ದಾರಿಗಳು ನೆನಪಿಗೆ ಬಂದವು. ಒಂದು ದಿನ ಮುಗಿದ ಅರಿವೇ ಆಗಲಿಲ್ಲ. ಇಷ್ಟು ಬೇಗ ಕಿರು ಪ್ರವಾಸ ಮುಗಿದೇ ಹೋಯಿತಲ್ಲಾ ಎಂದು ಭಾರವಾದ ಮನಸ್ಸಿನಿಂದ ಬಸ್ಸನ್ನು ಇಳಿದು ಸವಿನೆನಪನ್ನು ಮಾತ್ರ ಹೊತ್ತುಕೊಂಡು ತಮ್ಮ ತಮ್ಮ ಮನೆಗೆ ತೆರಳಿದರು.
ಪ್ರವಾಸದಲ್ಲಿ ಸಂಚಾಲಕರಾದ ಶ್ರೀ ಶಶಾಂಕ್, ಅಧ್ಯಕ್ಷರು, ಕಾರ್ಯದರ್ಶಿ, ಉಪಾಧ್ಯಕ್ಷರು, ದ್ವಿತೀಯ ಉಪಾಧ್ಯಕ್ಷರು, ಮಾಜಿ ಅಧ್ಯಕ್ಷರುಗಳು, ಸದಸ್ಯರು ಮತ್ತು ನಮ್ಮೆಲ್ಲರ ಬಂಧು ಮಿತ್ರರು ಮಕ್ಕಳು ಒಟ್ಟು 54 ಜನರ ತಂಡ ಪಾಲ್ಗೊಂಡು ಒಂದು ದಿನದ ಪ್ರವಾಸವನ್ನು ಯಶಸ್ವಿಗೋಳಿಸಿದರು.
