ಗುರು ಉಲ್ಲಾಯಗ್ ಸೊಲ್ಮೆ ಸಂದಾಯ…

ಒಂಜಿ ಬಿನ್ನಯ ಕೇನ್ಲೆ ಉಲ್ಲಾಯ

ಇರೆ ಪಾದ ಪುರ್ಪೊಗೆ ಸೊಲ್ಮೆ ಸಂದಯಾ…
ಕಬಿದಿ ಮಬ್ಬುಡು ಸಾದಿ ತೋಜಂದೆ
ದಿಕ್ಕ್ ಓಲುಂದು ದಿಂಜ ನಾಡಿಯಾ… || ಪ ||

ಕುಟ್ಟಿ ಅಮ್ಮಾಳೆ ಪುಣ್ಯ ಗರ್ಭೊಡೆ
ಪುಟ್ಟಿ ಬಾಲೆ ಈರಾದೆ ಮುಗುರು ತೆಲ್ತರ್…
ಕೇರಳ ಪನ್ಪಿಂಚಿ ದೇವೆರೆ ನಾಡ್‍ಡ್
ನಾರಾಯಣ ಪುದರ್‍ಡೆ ಮೆರೆಯರ್ ….!

ಎಂಕ್ಲೆ ಲೆಪ್ಪುಗು ಬೇಗ ಓಕೊಂಡರ್
ಗುರುನ ರೂಪೊಡೆ ಭೂಮಿ ಜತ್ತರ್…
ಸೋತಿ ಜೀವೊಗು ಮತಿನ್ ಕೊರಿಯರ್
ಭ್ರಾಂತಿ ದೂರ ಮಲ್ತ್‍ದ್ ತೆಲಿಪಯರ್… || ಪ ||

ಜಾತಿ ಧರ್ಮೊದ ನೆಪೊಟು ಭೂಮಿಡ್
ನೀತಿ ದಂಟ್‍ದೆ ಪೋಯಿ ಪೊರ್ತುಡ್
ಸತ್ಯೊದೊಂಜಿ ತುಡರ್ ಪೊತ್ತದ್
ಉಂದುವೆ ನಿನ್ನ ದೇವೆರ್ ಪಂಡರ್…!

ಕುಡಲದೂರುಗೆ ಪಾರ್ ಬತ್ತರ್
ಕುದುರು ಜರ್ತ್‍ದೆ ಬೆದ್‍ರ್ ಕಡ್ಪಯರ್…
ಪಾಪದಪ್ಪೆ ಜೋಕ್ಲೆಗೊಂಜಿ ಗುಂಡ ಕಟ್ಟದೆ ಕೊರಿಯರ್
ಕಾಶಿದೊಂಜಿ ಲಿಂಗ ಕನತರ್ ದೇವೆರೆ ಉಂಡು ಮಲ್ತರ್… || ಪ ||

ಎಡ್ಡೆ ದಿಕ್ಕ್‍ಗೆ ಸಾದಿ ತೋಜಾಲೆ
ದಡ್ಡ್ ಪಾರಾದೆ ಎಂಕ್ಲೆನ್ ಗೆಂದಲೆ…
ವಿದ್ಯೆ ಬುದ್ದಿದ ಗೇನ ದಿಂಜಾಲೆ
ಸತ್ಯ ಧರ್ಮೊಡೆ ಎಂಕ್ಲೆನ್ ನಡಪಾಲೆ…
ಸತ್ಯ ಧರ್ಮೊಡೆ ಎಂಕ್ಲೆನ್ ನಡಪಾಲೆ… || ಪ ||

ರಚನೆ: ಕೆ. ಹೆಚ್. ಬಂಗೇರ, ಕಕ್ಕಪದವು
ಕೋಡಿಕಲ್, ಮಂಗಳೂರು
ಮೊ: 9663554011