ಸಂಪಾದಕರ ಮಾತು:- ಗಂಗಾಧರ ಪೂಜಾರಿ

ಪ್ರೀಯ ಓದುಗರೇ,
ಜಗತ್ತನ್ನು ಒಮ್ಮೆ ಸೂಕ್ಷ್ಮವಾಗಿ ಗಮನಿಸಿದರೆ ಪ್ರತಿಯೊಬ್ಬರಲ್ಲೂ ನಮಗೆ ಕಾಣಸಿಗುವುದು ಆಸೆ ಮತ್ತು ಸ್ವಾರ್ಥದಿಂದ ಕೂಡಿದ ಜೀವನ. ಭೂಮಿಯ ಮೇಲೆ ಜೀವಿಸುವ ಪ್ರತಿಯೊಂದು ಜೀವಿಗೂ ಸ್ವಾರ್ಥ ಇರಲೇಬೇಕು. ಹಾಗಂತ ಅದು ಎಲ್ಲೆ ಮೀರಿರಬಾರದು. ನಾನು, ನಮ್ಮವರಷ್ಟೇ ಚೆನ್ನಾಗಿದ್ದರೆ ಸಾಕು ಎಂದು ಯೋಚಿಸಿ ಬೇರೆಯವರ ಹಿತಾಸಕ್ತಿಯನ್ನು ಬಲಿಕೊಡುವವರು ಅದೆಷ್ಟೋ ಜನ. ಇಂತಹ ಸ್ವಾರ್ಥವೆಂಬ ಬೆಂಕಿಯ ಬಳಿ ಶಾಂತಿ, ನೆಮ್ಮದಿ, ಸಹಬಾಳ್ವೆ ಎಂಬ ವಿಷಯವೇ ಇರುವುದಿಲ್ಲ. ಬದಲಾಗಿ ಅದು ನಮ್ಮನ್ನು ಸುಟ್ಟು ಭಸ್ಮ ಮಾಡುತ್ತದೆ. ನಾವು ನಮ್ಮವರು ಜೀವಿಸಲು ಸಾಧ್ಯವಾಗುವಷ್ಟು, ಹಣ, ಆಸ್ತಿ, ಕೂಡಿಟ್ಟರೆ ಸಾಕಾಗುವುದಿಲ್ಲವೇ? ಅದರ ಬದಲು ಲೆಕ್ಕವಿಲ್ಲದಷ್ಟು ಹಣ, ಒಡವೆಗಳನ್ನು ಬೀರುಗಳಲ್ಲಿ, ಪೆಟ್ಟಿಗೆಗಳಲ್ಲಿ, ನೆಲ ಮಾಳಿಗೆಯಲ್ಲಿ, ಗೋಡೆಗಳಲ್ಲಿ ಕನ್ನಕೊರೆದು ಅದರೊಳಗಡೆ ತುಂಬಿಸಿಡುವುದು ಯಾಕೆ ಬೇಕು? ಇನ್ನೂ ಕೆಲವು ಪ್ರಚಾರ ಪ್ರಿಯರು ದೇವರ ಹೆಸರಿನಲ್ಲಿ ಲಕ್ಷಗಟ್ಟಲೆ ದೇವಸ್ಥಾನಗಳಿಗೆ ಸುರಿದು ಒಂದು ರೀತಿಯ ಸಂತೋಷವನ್ನು ಪಡೆಯುತ್ತಾರೆ. ಆ ಸಂತೋಷ ಶಾಶ್ವತವಲ್ಲ ಎಂಬ ಸಾಮಾನ್ಯ ಜ್ಞಾನವೂ ನಮಗೆ ಇಲ್ಲವಾಗಿದೆ. ಸಮಾಜಕ್ಕೆ ಇದರಿಂದ ಯಾವ ರೀತಿಯ ಒಳಿತಾಗಿದೆ ಎಂಬುದನ್ನು ನಾವು ತಿಳಿಯುವುದಿಲ್ಲ. ದೇವರು ಒಂದಲ್ಲ ಒಂದು ದಿನ ಇಂತಹ ಶ್ರೀಮಂತಿಕೆಯನ್ನು ಪರೀಕ್ಷಿಸಿರುವ ಅದೆಷ್ಟೋ ಉದಾಹರಣೆಗಳು ನಮ್ಮ ಕಣ್ಣ ಮುಂದೆ ಇವೆ. ನಮ್ಮ ಸಂತೋಷವನ್ನು ನಾವು ಹೇಗೆ ಬಯಸುತ್ತೇವೆಯೋ ಹಾಗೆಯೇ ಇನ್ನೊಬ್ಬರ ಸಂತೋಷವನ್ನು ನಾವು ಬಯಸಬೇಕು. ಇದಕ್ಕಾಗಿ ದಾನ, ಧರ್ಮದಂತಹ ಸೇವಾ ಕಾರ್ಯಗಳಲ್ಲಿ ನಮ್ಮನ್ನು ಕಿಂಚಿತ್ತಾದರೂ ತೊಡಗಿಸಿಕೊಳ್ಳಬೇಕು. ಬೇರೆಯವರ, ಸಮಸ್ಯೆಗಳಿಗೆ, ಕಷ್ಟಗಳಿಗೆ ಸ್ಪಂದಿಸುವ ಗುಣ ಬೆಳೆಸಿಕೊಳ್ಳಬೇಕು.
ಈ ಸಮಾಜದಲ್ಲಿ ಅದೆಷ್ಟೋ ಜನ ದಿನಕ್ಕೆ ಮೂರು ಹೊತ್ತು ಊಟ ಮಾಡದವರು, ಬದುಕಲು ವಸತಿ ಇಲ್ಲದವರು, ಈಗಿನ ಶಿಕ್ಷಣದ ವ್ಯಾಪಾರೀಕರಣದಿಂದಾಗಿ ವಿದ್ಯೆಯನ್ನು ಮುಂದುವರಿಸಲಾಗದೆ ತನ್ನ ಜೀವನವನ್ನೇ ನರಕಕ್ಕೆ ದೂಡಿಸಿಕೊಂಡ ಅದೆಷ್ಟು ಸಂಸಾರಗಳು ನಮ್ಮ ಕಣ್ಣ ಮುಂದೆ ಇವೆ. ಇಂತಹ ಸಮಾಜದ ಏಳಿಗೆಯನ್ನು ಬಯಸಿ, ಶಿಕ್ಷಣಕ್ಕೆ ಒತ್ತುಕೊಟ್ಟು, ಬಡಮಕ್ಕಳನ್ನು ಸಮಾಜದ ಉನ್ನತಗಿರಿಗೆ ತಲುಪಿಸಿದರೆ ಇದರಿಂದ ಸಿಗುವ ಮನೋಲ್ಲಾಸ, ಶಾಂತಿ, ನೆಮ್ಮದಿಗಿಂತ ಬೇರೊಂದು ಇಲ್ಲವೇ ಇಲ್ಲ. ಇದರಿಂದ ದೇವರ ಸೇವೆ ಮಾಡಿದಂತಹ ಪುಣ್ಯ ನಮ್ಮನ್ನು ಆವರಿಸುತ್ತದೆ. ದೇವನು ಸದ್ದಿಲ್ಲದೆ ನಮ್ಮನ್ನು ಮನತುಂಬಾ ಹರಸುತ್ತಾನೆ, ಕಾಯುತ್ತಾನೆ ಎಂಬುದಕ್ಕೆ ಸಂಶಯವೇ ಇಲ್ಲ. ಹಾಗಾದರೆ ಯೋಚನೆ ಯಾಕೆ? ಸ್ವಾರ್ಥ ಜೀವನವನ್ನು ಬಿಟ್ಟುಬಿಡೋಣ. ಈಗ ಸರಿಯಾದ ಸಂದರ್ಭ. ಸಮಾಜದ ಅದೆಷ್ಟೋ ನಮ್ಮ ಪ್ರತಿಭೆಗಳು, ಆರ್ಥಿಕ ತೊಂದರೆಯಿಂದಾಗಿ ತಮ್ಮ ವಿದ್ಯಾಭ್ಯಾಸವನ್ನು ಮುಂದುವರಿಸಲಾಗದೆ ಯೋಚಿಸುತ್ತಾ ಕುಳಿತಿವೆ. ಅವರಿಗೆಲ್ಲಾ ನಮ್ಮ ಧೈರ್ಯದ ಸಹಾಯ ಹಸ್ತ ಬೇಕಾಗಿದೆ. ಬನ್ನಿ ಕೈ ಹಿಡಿದು ಆದರಿಸೋಣ. ಉನ್ನತ ಶಿಕ್ಷಣ ಪಡೆದ ಮಕ್ಕಳಿಗೆ ಮುಂದಿನ ದಾರಿಯನ್ನು ತೋರಿಸೋಣ. ಅವರ ಮೊಗದಲ್ಲಿ ನಗುವಿನ ಅಲೆಯನ್ನು ನೋಡೋಣ, ನಮ್ಮ ಮನಸ್ಸಿನ ಶಾಂತಿ, ನೆಮ್ಮದಿಯನ್ನು ಕಾಪಾಡೋಣ.
ಕಳೆದ ಸಂಚಿಕೆಯಲ್ಲಿ ಪ್ರಕಟವಾದ “ಮಕ್ಕಳ ಬೆಳವಣಿಗೆಯಲ್ಲಿ ಹೆತ್ತವರ ಪಾತ್ರ” ಎಂಬ ಆಶಯ ಲೇಖನದ ಮುಖಾಂತರ ಪೋಷಕರ ಕರ್ತವ್ಯದ ಬಗ್ಗೆ ಕಿವಿ ಮಾತು ಹೇಳಿರುವ ಶ್ರೀಮತಿ ನಿರ್ಮಲಾ ಸಂಜೀವ್ ಸುರತ್ಕಲ್ ಇವರಿಗೂ, ಬಿಲ್ಲವರು ಮತ್ತು ಜಾತಿಗಿರುವ ಉಪನಾಮಗಳು ಈ ಬಗ್ಗೆ ಲೇಖನವನ್ನು ನೀಡಿರುವ ಶೈಲು ಬಿರ್ವ, ಇವರಿಗೂ ಯುವ ಸಿಂಚನ ಬಳಗದ ಕೃತಜ್ಞತೆಗಳು.
ಈ ಸಂಚಿಕೆಯಲ್ಲಿ ಪ್ರೊ| ಮೋಹನ್ ಕೋಟ್ಯಾನ್‍ರವರ “ಸಾಮಾಜಿಕ ಆತ್ಮ ಶೋಧನೆ” ಎಂಬ ಆಶಯ ಲೇಖನ ಹಾಗೂ ವಿವಿಧ ಘಟಕಗಳ ಸಾಮಾಜಿಕ ಕಾರ್ಯಚಟುವಟಿಕೆಗಳ ಬಗ್ಗೆ ಸಂಪೂರ್ಣ ಚಿತ್ರಣ ಮತ್ತು ಸಮಾಜದ ವಿದ್ಯಾರ್ಥಿಗಳಿಗೆ ಶಿಕ್ಷಣ ಮುಂದುವರಿಸಲು ಸಹಕಾರಿಯಾಗುವಂತೆ ಕೆಲವೊಂದು ವಿದ್ಯಾರ್ಥಿ ವೇತನ ಸಿಗುವ ದಾರಿಗಳನ್ನು ತೋರಿಸಲಾಗಿದೆ. 2016-17ನೇ ಸಾಲಿನ ಶೈಕ್ಷಣಿಕ ವರ್ಷದಲ್ಲಿ ಶೇ. 80ಕ್ಕಿಂತ ಮೇಲ್ಪಟ್ಟು ಅಂಕ ಪಡೆದು ಸಾಧನೆ ಮಾಡಿದ ನಮ್ಮ ಸಮಾಜದ ಮಕ್ಕಳ ಭಾವಚಿತ್ರಗಳನ್ನು ಪ್ರಕಟಿಸಲಾಗಿದೆ. ಪ್ರೀತಿಯ ವಾಚಕರೇ ಒಮ್ಮೆ ಸಂಪೂರ್ಣವಾಗಿ ಕಣ್ಣಾಡಿಸಿ ನಮ್ಮ ಪ್ರತಿಭೆಗಳನ್ನು ಪ್ರೋತ್ಸಾಹಿಸುತ್ತೀರಿ ತಾನೆ…