
ಅಲೆಗಳಾಚೆಯ ಅಸ್ಮಿತೆ
ಸಾಗರದ ಅಲೆಗಳ ಮಡಿಲಲಿ ಮಿಂದೆದ್ದ ಮಣ್ಣಿದು,
ಸಹ್ಯಾದ್ರಿಯ ಹಸಿರ ಸೆರಗಲಿ ನಲಿದಾಡುವ ನಾಡಿದು.
ಪರಶುರಾಮನ ಸೃಷ್ಟಿಯೆಂಬ ಪುರಾಣದ ಪುಣ್ಯಭೂಮಿ,
ಪರಂಪರೆಯ ಬೆಳಕ ಸೂಸುವ ಸಂಸ್ಕೃತಿಯ ತವರೂರು ಈ ಭೂಮಿ
ಯಕ್ಷಗಾನದ ಬಣ್ಣದಲಿ ಪುರಾಣಗಳು ಜೀವ ತಳೆಯುವವು
ಚೆಂಡೆ ಮದ್ದಳೆಯ ನಾದದಲಿ ರಾತ್ರಿಗಳು ರಂಗೇರುವವು
ಭೂತಾರಾಧನೆಯ ನಂಬಿಕೆಯಲಿ ದೈವದ ನುಡಿ ಮೊಳಗುವುದು
ಕಂಬಳದ ಕೆಸರುಗದ್ದೆಯಲಿ ವೀರದ ಕಿಚ್ಚು ಹೊತ್ತುವುದು
ತುಳುವಿನ ಸೊಗಸಿನಲಿ ಮಣ್ಣಿನ ಮಮತೆ ಹರಿಯುವುದು
ಕೊಂಕಣಿಯ ಮಧುರತೆಯಲಿ ಬಂಧುತ್ವದ ಬೆಸುಗೆ ಅರಳುವುದು
ಬ್ಯಾರಿಯ ನುಡಿಯೊಳಗೆ ಸೌಹಾರ್ದದ ಸುಗಂಧ ಸೂಸುವುದು
ಕನ್ನಡದ ಕಾವ್ಯಧಾರೆಯಲಿ ಕರಾವಳಿಯ ಹಿರಿಮೆ ಮಿನುಗುವುದು
ಕಡಲ ಕಿನಾರೆಯ ತೆಂಗಿನ ಮರ ಗಾಳಿಗೆ ತಲೆದೂಗುವುದು
ನೇತ್ರಾವತಿ, ಶರಾವತಿಯ ಒಡಲಲಿ ಬದುಕು ಅರಳುವುದು
ಉಪ್ಪಿನ ಗಾಳಿಯ ನಡುವೆಯೂ ದುಡಿಮೆಯ ಬೆವರು ಮಿನುಗುವುದು
ಮೀನುಗಾರನ ಬಲೆಯೊಳಗೆ ಕುಟುಂಬದ ಕನಸು ನಲಿಯುವುದು
ಅಬ್ಬಕ್ಕನ ಕಿಚ್ಚು, ಮಂಜಣ್ಣನ ಶೌರ್ಯ ಇತಿಹಾಸದಲಿ ಅಮರ,
ವೀರರ ತ್ಯಾಗದ ಕೀರ್ತಿಪತಾಕೆ ಹಾರಲಿ ಅಂಬರದಾಚೆ ನಿರಂತರ.
ಕಡಲ ಅಲೆಗಳ ಮೊಳಗಲಿ ಕನ್ನಡದ ಹಿರಿಮೆಯ ಗಾನ,
ಕರಾವಳಿಯ ಕೀರ್ತಿಕಿರೀಟ ಹೊಳೆಯಲಿ ಜಗದಲಿ ಚಿರಕಾಲ.
-✍️ಪೂರ್ಣಿಮಾ ಕೋಟ್ಯಾನ್ ಮಾರ್ನಾಡು , ಮೂಡಬಿದಿರೆ




