ಹಣತೆಯ ಬೆಳಕಿಗಿಂತ ಮಿಗಿಲಾದ ಪ್ರೀತಿಯ ಬೆಳಕು ಮೂಡಿಸಿದ ದೀಪಾವಳಿ ಸಂಭ್ರಮ

ಕಡಬ ನ. 08 : ದೀಪಾವಳಿ ಎಂದರೆ ಕೇವಲ ಹಣತೆ ಬೆಳಗಿಸಿ ಪಟಾಕಿ ಸಿಡಿಸುವ ಹಬ್ಬವಲ್ಲ; ಮತ್ತೊಬ್ಬರ ಬದುಕಿನಲ್ಲಿ ಪ್ರೀತಿ, ವಿಶ್ವಾಸ ಹಾಗೂ ಸಂತೋಷದ ಬೆಳಕು ಮೂಡಿಸುವ ಮಾನವೀಯತೆಯ ಹಬ್ಬ ಎಂಬುದನ್ನು ಯುವವಾಹಿನಿ (ರಿ.) ಕಡಬ ಘಟಕವು ವಿಶಿಷ್ಟವಾಗಿ ಸಾರಿತು.

ದೀಪಾವಳಿ ಪ್ರಯುಕ್ತ ಕಡಬದ ಉಮ್ಮಕ್ಕ ಯಾನೆ ದೋಳದ ಅಪ್ಪೆ ಅವರ ಮನೆಯಲ್ಲಿ ನವೆಂಬರ್ 8ರಂದು ‘ಕರುಣೆಯ ಬೆಳಕು’ ಎಂಬ ಶೀರ್ಷಿಕೆಯಡಿ ಅರ್ಥಪೂರ್ಣ ದೀಪಾವಳಿ ಆಚರಣೆಯನ್ನು ಹಮ್ಮಿಕೊಳ್ಳಲಾಯಿತು. ದೋಳದ ಅಪ್ಪೆ ಅವರು ಹಣತೆ ಬೆಳಗಿಸುವ ಮೂಲಕ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಸುಮಾರು 100 ಮಂದಿ ಯುವವಾಹಿನಿ ಸದಸ್ಯರು ಹಾಗೂ ಬಂಧುಗಳು ಭಾಗವಹಿಸಿ, ದೋಳದ ಅಪ್ಪೆಯವರೊಂದಿಗೆ ಕುಟುಂಬದ ಸದಸ್ಯರಂತೆ ಹಬ್ಬದ ಸಂಭ್ರಮವನ್ನು ಹಂಚಿಕೊಂಡರು. ಈ ಸಂದರ್ಭದಲ್ಲಿ ಘಟಕದ ವತಿಯಿಂದ ಅವರಿಗೆ ಸೀರೆ ನೀಡಿ ಗೌರವಿಸಿ ಆಶೀರ್ವಾದ ಪಡೆಯಲಾಯಿತು. ನಂದೀಶ್ ಅಲಂಕಾರ್ ಅವರು ದೋಳದ ಅಪ್ಪೆಯವರನ್ನು ತಾಯಿಯ ಸ್ಥಾನದಲ್ಲಿರಿಸಿ ದೀಪಾವಳಿ ಉಡುಗೊರೆಯಾಗಿ ಮಿಕ್ಸಿಯನ್ನು ನೀಡುವ ಮೂಲಕ ವಿಶೇಷ ಪ್ರೀತಿ ಮತ್ತು ಗೌರವವನ್ನು ವ್ಯಕ್ತಪಡಿಸಿದರು.

ಮನೆಯ ಅಂಗಳದಲ್ಲಿ ಹಣತೆಗಳನ್ನು ಬೆಳಗಿಸಿ, ಪಟಾಕಿ ಸಿಡಿಸಿ ಸಂಭ್ರಮಿಸಿದ ಸದಸ್ಯರು ಒಟ್ಟಾಗಿ ಭೋಜನ ಸವಿದರು. ಬಳಿಕ ಜೇನಿನ ಗೂಡು ಸೇರಿದಂತೆ ವಿವಿಧ ಹಾಡುಗಳಿಗೆ ಹೆಜ್ಜೆ ಹಾಕಿ ಸಂಭ್ರಮಿಸಿದರು. ವಯಸ್ಸಿನ ಅಂತರವನ್ನು ಮರೆತು ಎಲ್ಲರೂ ಒಂದಾಗಿ ಕುಣಿದು ಕುಪ್ಪಳಿಸಿದ ಕ್ಷಣಗಳು ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿದ್ದವು.

‘ಯಾರೂ ಒಂಟಿಯಲ್ಲ, ನಿಮ್ಮೊಂದಿಗೆ ನಾವಿದ್ದೇವೆ’ ಎಂಬ ಭರವಸೆಯನ್ನು ಮೂಡಿಸುವುದರೊಂದಿಗೆ, ಯುವವಾಹಿನಿ ಕೇವಲ ಒಂದು ಸಂಘಟನೆಯಲ್ಲ; ಅದು ಪ್ರೀತಿ, ವಿಶ್ವಾಸ ಮತ್ತು ಮಾನವೀಯತೆಯಿಂದ ಬೆಸೆದ ಕುಟುಂಬ ಎಂಬುದನ್ನು ಘಟಕದ ಅಧ್ಯಕ್ಷ ಉಮೇಶ್ ಬಳ್ಪ ಅವರು ತಮ್ಮ ಅಧ್ಯಕ್ಷೀಯ ಭಾಷಣದಲ್ಲಿ ಭಾವುಕರಾಗಿ ನುಡಿದರು.

ರಕ್ತಸಂಬಂಧವೊಂದೇ ಪ್ರೀತಿಗೆ ಮಾನದಂಡವಲ್ಲ; ನಿಷ್ಕಲ್ಮಶ ಪ್ರೀತಿ, ಕಾಳಜಿ ಮತ್ತು ಆತ್ಮೀಯತೆಯೇ ನಿಜವಾದ ಮಾನವೀಯ ಸಂಬಂಧ ಎಂಬುದನ್ನು ಈ ಕಾರ್ಯಕ್ರಮ ಸಾಬೀತುಪಡಿಸಿತು. ಕಾರ್ಯಕ್ರಮದಲ್ಲಿ ಶಿವಪ್ರಸಾದ್ ನೂಚಿಲ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಮಾತಿನ ಮಲ್ಲಿ ಸುಪ್ರೀತಾ ಚರಣ್ ಪಾಲಪ್ಪೆ ಕಾರ್ಯಕ್ರಮ ನಿರೂಪಿಸಿದರು. ನಿಯೋಜಿತ ಅಧ್ಯಕ್ಷೆ ಸರಿತಾ ಉಂಡಿಲ ಧನ್ಯವಾದ ಸಮರ್ಪಿಸಿದರು. ಈ ಸಂದರ್ಭದಲ್ಲಿ ಯುವವಾಹಿನಿ ಕೇಂದ್ರ ಸಮಿತಿಯ ಸಂಘಟನಾ ಕಾರ್ಯದರ್ಶಿ ಸುಂದರ ಪೂಜಾರಿ ಅಂಙನ, ಬಿಲ್ಲವ ಗ್ರಾಮ ಸಮಿತಿ ಅಧ್ಯಕ್ಷ ಚಿನ್ನಪ್ಪ ಪೂಜಾರಿ ಕೊರಪ್ಪಣೆ, ತಾಲೂಕು ಮಹಿಳಾ ಬಿಲ್ಲವ ಸಂಘ (ರಿ.) ಪುತ್ತೂರು ಇದರ ಉಪಾಧ್ಯಕ್ಷೆ ಶ್ವೇತಾ ಕುದುಂಬೂರು, ನಿಯೋಜಿತ ಉಪಾಧ್ಯಕ್ಷ ಜಯಪ್ರಕಾಶ್ ದೋಳ, ನಿಯೋಜಿತ ಕಾರ್ಯದರ್ಶಿ ಧನಂಜಯ ಮರ್ದಾಳ ಸೇರಿದಂತೆ ಘಟಕದ ಪದಾಧಿಕಾರಿಗಳು, ನಿರ್ದೇಶಕರು ಹಾಗೂ ಸದಸ್ಯರು ಉಪಸ್ಥಿತರಿದ್ದರು.

ಒಂದು ಮನೆಯ ಅಂಗಳದಲ್ಲಿ ಬೆಳಗಿದ ಹಣತೆಗಳು ನೂರಾರು ಹೃದಯಗಳಲ್ಲಿ ಪ್ರೀತಿಯ ಬೆಳಕನ್ನು ಹರಡಿದವು. ಮಾನವೀಯತೆಯ ಮೌಲ್ಯಗಳನ್ನು ಎತ್ತಿಹಿಡಿದ ‘ಕರುಣೆಯ ಬೆಳಕು’ ಕಾರ್ಯಕ್ರಮವು ದೀಪಾವಳಿಯ ನಿಜವಾದ ಆಶಯವನ್ನು ಸಾಕಾರಗೊಳಿಸಿ, ಸಮಾಜಕ್ಕೆ ಪ್ರೀತಿ, ಕಾಳಜಿ ಮತ್ತು ಸಹಬಾಳ್ವೆಯ ಸಂದೇಶವನ್ನು ಸಾರಿತು.