ಮೂಡುಬಿದಿರೆ ಅ 4 : ಯುವವಾಹಿನಿ (ರಿ.) ಕೇಂದ್ರ ಸಮಿತಿಯ ಆಶ್ರಯದಲ್ಲಿ ಯುವವಾಹಿನಿ (ರಿ.) ಮೂಡುಬಿದಿರೆ ಘಟಕದ ಆತಿಥ್ಯದಲ್ಲಿ ನಡೆದ ಕ್ರೀಡೋತ್ಸವ–2026ರಲ್ಲಿ ಯುವವಾಹಿನಿ (ರಿ.) ಬಜಪೆ ಘಟಕವು ಗಮನಾರ್ಹ ಸಾಧನೆ ಮಾಡಿದ್ದು, ಪ್ರತಿಷ್ಠಿತ ‘ಅತ್ಯುತ್ತಮ ಶಿಸ್ತಿನ ಘಟಕ’ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿದೆ.
ಕ್ರೀಡೋತ್ಸವದಲ್ಲಿ ಬಜಪೆ ಘಟಕದ ಸದಸ್ಯರು ವಿವಿಧ ಗುಂಪು ಹಾಗೂ ವೈಯಕ್ತಿಕ ಕ್ರೀಡಾ ಸ್ಪರ್ಧೆಗಳಲ್ಲಿ ಉತ್ಸಾಹದಿಂದ ಭಾಗವಹಿಸಿ, ವೈಯಕ್ತಿಕ ವಿಭಾಗದ ಹಲವು ಸ್ಪರ್ಧೆಗಳಲ್ಲಿ ಬಹುಮಾನಗಳನ್ನು ಗಳಿಸುವ ಮೂಲಕ ಘಟಕದ ಕೀರ್ತಿಯನ್ನು ಹೆಚ್ಚಿಸಿದರು.
ಕ್ರೀಡಾ ಪ್ರತಿಭೆಯೊಂದಿಗೆ ಶಿಸ್ತು, ಸಮಯಪಾಲನೆ, ಸಂಘಟಿತ ನಡವಳಿಕೆ, ಒಗ್ಗಟ್ಟು ಹಾಗೂ ತಂಡದ ಮನೋಭಾವವನ್ನು ಪ್ರದರ್ಶಿಸಿದ ಬಜಪೆ ಘಟಕವು ‘ಅತ್ಯುತ್ತಮ ಶಿಸ್ತಿನ ಘಟಕ’ ಪ್ರಶಸ್ತಿಗೆ ಭಾಜನವಾಯಿತು.
ಕ್ರೀಡೋತ್ಸವದಲ್ಲಿ ಘಟಕದ ಸದಸ್ಯರು ತೋರಿದ ಸಂಘಟಿತ ಪ್ರಯತ್ನ, ಶಿಸ್ತುಬದ್ಧ ನಡೆ ಹಾಗೂ ಕ್ರೀಡಾಸ್ಫೂರ್ತಿಗೆ ಈ ಪ್ರಶಸ್ತಿಯು ಸಾಕ್ಷಿಯಾಗಿದೆ. ಕ್ರೀಡೆಯ ಮೂಲಕ ಪ್ರತಿಭೆಯನ್ನು ಅನಾವರಣಗೊಳಿಸುವುದರ ಜೊತೆಗೆ ಸಂಘಟನೆಯ ಗೌರವವನ್ನು ಹೆಚ್ಚಿಸಿದ ಬಜಪೆ ಘಟಕದ ಸಾಧನೆಗೆ ಅಭಿನಂದನೆಗಳು ವ್ಯಕ್ತವಾಗಿವೆ.
