ಯುವವಾಹಿನಿಯ 38 ವರ್ಷಗಳ ಸಾರ್ಥಕ ಪಯಣದ ಬಳಿಕ, 39ನೇ ಅಧ್ಯಕ್ಷನಾಗಿ ಈ ಮಹತ್ತರ ಜವಾಬ್ದಾರಿಯನ್ನು ವಹಿಸಿಕೊಳ್ಳುವ ಅವಕಾಶ ನನಗೆ ದೊರೆತಿರುವುದು, ನನ್ನ ಜೀವನದ ಅತ್ಯಂತ ಅಮೂಲ್ಯ ಕ್ಷಣವಾಗಿದೆ. ಇದು ಕೇವಲ ಸ್ಥಾನಮಾನವಲ್ಲ, ಇದು ನಂಬಿಕೆಯ ಪ್ರತಿಬಿಂಬ, ಹೊಣೆಗಾರಿಕೆಯ ಆಳ, ಮತ್ತು ಸೇವಾ ಸಂಕಲ್ಪದ ಹೊಸ ಅಧ್ಯಾಯ.
80ರ ದಶಕದಲ್ಲಿ ದೂರದರ್ಶಿ ಯುವಕರ ಕೈಚಳಕದಿಂದ ರೂಪುಗೊಂಡ ಈ ಸಂಸ್ಥೆ, ಇಂದು ಲೋಕಮಾನ್ಯತೆಯ ದಿಕ್ಕಿನಲ್ಲಿ ಸಾಗುತ್ತಿರುವುದು ಹಿರಿಯ ಸದಸ್ಯರ ನಿಸ್ವಾರ್ಥ ಸೇವೆ, ತ್ಯಾಗ ಮತ್ತು ದೃಢಚಿತ್ತತೆಯ ದ್ಯೋತಕವಾಗಿದೆ.
ಕಾಲ ಬದಲಾಗುತ್ತಿದ್ದಂತೆ ಹೊಸ ಯೋಚನೆಗಳು, ಕೌಶಲ್ಯಾಧಾರಿತ ಕಾರ್ಯಗಳು ಮತ್ತು ಸೃಜನಾತ್ಮಕ ಚಿಂತನೆಗಳೊಂದಿಗೆ ಯುವವಾಹಿನಿ ತನ್ನ ಹೆಜ್ಜೆಗುರುತುಗಳನ್ನು ಮತ್ತಷ್ಟು ಬಲಪಡಿಸುತ್ತಿದೆ. ಸಂಘಟನೆ ಕಟ್ಟಡವಲ್ಲ ಅದು ಚಿಂತನೆಯ ಶಿಲ್ಪ.
ಅಧಿಕಾರ ಸ್ಥಾನವಲ್ಲ ಅದು ಹೊಣೆಗಾರಿಕೆಯ ಪ್ರತಿಧ್ವನಿ. 35 ಘಟಕಗಳ ಸಮನ್ವಯ, 4000ಕ್ಕೂ ಅಧಿಕ ಯುವಮನಸ್ಸುಗಳ ವಿಶ್ವಾಸ ಈ ವಿಶಾಲ ವ್ಯಾಪ್ತಿಯ ನಡುವೆ, ಯುವವಾಹಿನಿ ಕೇಂದ್ರ ಸಮಿತಿಯ ಅಧ್ಯಕ್ಷನಾಗಿ ನಾನು ನಿಂತಿರುವುದು ಒಂದು ಸ್ಥಾನದಲ್ಲಿ ಅಲ್ಲ; ಒಂದು ಸಂಕಲ್ಪದ ಅಂಚಿನಲ್ಲಿ.
ಯುವವಾಹಿನಿ ಎಂದರೆ ಕಾಲಘಟ್ಟದ ಪ್ರತಿಕ್ರಿಯೆ. ಸಮಾನತೆಯ ಮಹತ್ವವನ್ನು ಸಾರಿದ ಬ್ರಹ್ಮಶ್ರೀ ನಾರಾಯಣ ಗುರುಗಳ ತತ್ವಗಳು ಇಂದಿನ ಯುವ ಮನಸ್ಸಿನಲ್ಲಿ ಪ್ರತಿಧ್ವನಿಸಿದಾಗ, ಅವು ಇತಿಹಾಸವಾಗಿರುವುದಿಲ್ಲಅವು ಜೀವಂತ ಚಿಂತನೆಯಾಗಿ ಮೂಡಿಬರುತ್ತವೆ. ವಿದ್ಯೆ, ಉದ್ಯೋಗ, ಸಂಪರ್ಕದ ಪಥದಲ್ಲಿ ಯುವಶಕ್ತಿಯನ್ನು ಚಲಿಸುವ ಶಕ್ತಿಯಾಗಿ ರೂಪಿಸುವುದೇ ನಮ್ಮ ಸಂಘಟನೆಯ ಮೂಲ ಆತ್ಮ.
ಯುವವಾಹಿನಿ ಮುಖವಾಣಿ “ಯುವಸಿಂಚನ” ಕೇವಲ ಸುದ್ದಿಗಳ ಸಂಗ್ರಹವಲ್ಲ; ಅದು ಕಾಲದೊಂದಿಗೆ ಸಂವಾದ ನಡೆಸುವ ಚಿಂತನೆಯ ದರ್ಪಣ. ಇಲ್ಲಿ ಪ್ರಕಟವಾಗುವ ಪ್ರತಿಯೊಂದು ಅಕ್ಷರವೂ ಒಂದು ಅನುಭವದ ಸಾಕ್ಷ್ಯ, ಒಂದು ಸೇವೆಯ ದಾಖಲಾತಿ, ಒಂದು ಯುವಮನಸ್ಸಿನ ಪ್ರಶ್ನೆ ಅಥವಾ ಉತ್ತರ.
ಗೌರವ ಸಂಪಾದಕರಾಗಿ, ಈ ಪತ್ರಿಕೆ ಸಂಘಟನೆಯ ಒಳಚಿಂತನೆಗಳನ್ನಷ್ಟೇ ಅಲ್ಲ, ಸಮಾಜದೊಂದಿಗೆ ನಡೆಸುವ ನೈತಿಕ ಸಂವಾದವನ್ನೂ ಪ್ರತಿಬಿಂಬಿಸಲಿ ಎಂಬುದು ನನ್ನ ಹಾರೈಕೆ. ಮುಂದಿನ ಒಂದು ವರ್ಷದ ಪಯಣ ಯೋಜನೆಗಳಿಗಿಂತ ಮೌಲ್ಯಗಳ ಮೇಲೆ, ಸಂಖ್ಯೆಗಳಿಗಿಂತ ಸಂಬಂಧಗಳ ಮೇಲೆ, ಘೋಷಣೆಗಳಿಗಿಂತ ಕಾರ್ಯಗಳ ಮೇಲೆ ನಿಲ್ಲಬೇಕಾಗಿದೆ. ಸಂಘಟನೆ ಶಕ್ತಿಯಾಗುವುದು ಅದರ ಸದಸ್ಯರು ಪ್ರಶ್ನಿಸಿದಾಗ, ಪರಿಶೀಲಿಸಿದಾಗ ಮತ್ತು ಹೊಣೆ ಹೊತ್ತು ನಡೆಯುವಾಗ ಮಾತ್ರ.
ಘಟಕಗಳ ಪದಾಧಿಕಾರಿಗಳು ಮತ್ತು ಅರ್ಹ ಸದಸ್ಯರಿಗಾಗಿ ಆಯೋಜಿಸಿದ ವಿಕಾಸ -2026 ಕಾರ್ಯಾಗಾರದಲ್ಲಿ 174 ಸದಸ್ಯರು ಭಾಗವಹಿಸಿರುವುದು ಯುವವಾಹಿನಿಯ ಚೈತನ್ಯವನ್ನು ತೋರಿಸುತ್ತದೆ. ಇದರ ಯಶಸ್ಸಿಗೆ ಕಾರಣರಾದ ಯುವವಾಹಿನಿ ಮಂಗಳೂರು ಘಟಕದ ಅಧ್ಯಕ್ಷರು ಮತ್ತು ಸದಸ್ಯರು ಮತ್ತು ಕೇಂದ್ರ ಸಮಿತಿಯ ವ್ಯಕ್ತಿತ್ವ ವಿಕಸನ ನಿರ್ದೇಶಕರಿಗೆ ಹೃತ್ಪೂರ್ವಕ ಅಭಿನಂದನೆಗಳು.
ಹಾಗೆಯೇ, ಅಪಾರ ಯಶಸ್ಸು ಕಂಡ “ಸಖೀ ಸಂವಾದ 2026” ಕಾರ್ಯಾಗಾರವನ್ನು ಆತಿಥ್ಯ ವಹಿಸಿ ಅತ್ಯುತ್ತಮವಾಗಿ ಆಯೋಜಿಸಿದ ಕೊಲ್ಯ ಘಟಕದ ಅಧ್ಯಕ್ಷರು, ಸದಸ್ಯರು ಮತ್ತು ಕೇಂದ್ರ ಸಮಿತಿಯ ಮಹಿಳಾ ಸಂಘಟನಾ ನಿರ್ದೇಶಕರಿಗೆ ಕೃತಜ್ಞತೆಗಳು.
ಯುವವಾಹಿನಿಯ ಡಿಜಿಟಲ್ ಕ್ರಾಂತಿ : ಮತ್ತೊಂದು ಹೆಜ್ಜೆ ಮುಂದಕ್ಕೆ ಡಿಜಿಟಲ್ ಯುಗದೊಂದಿಗೆ ಸಮನ್ವಯವಾಗಿ ಹೆಜ್ಜೆ ಹಾಕುತ್ತಿರುವ ಯುವವಾಹಿನಿಯು, ತನ್ನ ಆಡಳಿತ ಮತ್ತು ಕಾರ್ಯವೈಖರಿಯಲ್ಲಿ ಹೊಸ ಆಯಾಮಗಳನ್ನು ಸ್ಥಾಪಿಸುತ್ತಿದೆ.
`ಸಂಪರ್ಕ’ ವೆಬ್ಸೈಟ್ ಮೂಲಕ ಆನ್ಲೈನ್ ರಶೀದಿ ಹಾಗೂ ಹಾಜರಾತಿ ವ್ಯವಸ್ಥೆಯನ್ನು ಪರಿಣಾಮಕಾರಿಯಾಗಿ ಜಾರಿಗೊಳಿಸುವ ಮೂಲಕ, ಸಂಸ್ಥೆ ಡಿಜಿಟಲ್ ವ್ಯವಸ್ಥೆಯಲ್ಲಿ ಹೊಸ ಇತಿಹಾಸ ನಿರ್ಮಿಸಿದೆ. ಅಂತರ್ಜಾಲ ಭದ್ರತೆ: yuvavvahuni.in ಜೊತೆಗೆ yuvavvahuni.com
ಹಾಗೂ yuvavvahuni.org ಡೊಮೇನ್ಗಳನ್ನು ಸಂಸ್ಥೆಯ ಹೆಸರಿನಲ್ಲಿ ನೋಂದಾಯಿಸುವ ಮೂಲಕ, ಯುವವಾಹಿನಿಯ ಡಿಜಿಟಲ್ ಅಸ್ತಿತ್ವವನ್ನು ಮತ್ತಷ್ಟು ಭದ್ರಪಡಿಸಲಾಗಿದೆ. ಮಾಹಿತಿ ತಂತ್ರಜ್ಞಾನ ಕಾನೂನು ಹಾಗೂ ನಿಯಮಾವಳಿಗಳಿಗೆ ಅನುಸಾರವಾಗಿ, ಸಂಸ್ಥೆಯ ಅಧಿಕೃತ OTP ಸೇವೆಗೆ TELECOM REGULATORY AUTHORITY OF INDIA (TRAI) ಮಾನ್ಯತೆ ಪಡೆಯುವ ಮೂಲಕ, ಡಿಜಿಟಲ್ ವಲಯದಲ್ಲಿ ಯುವವಾಹಿನಿಯ ಬದ್ಧತೆ ಮತ್ತೊಮ್ಮೆ ಸ್ಪಷ್ಟವಾಗಿದೆ. ಈ ಎಲ್ಲಾ ಕ್ರಮಗಳು ಯುವವಾಹಿನಿಯ ಕಾರ್ಯಚಟುವಟಿಕೆಗಳಲ್ಲಿ ಪಾರದರ್ಶಕತೆ ಮತ್ತು ದಕ್ಷತೆಯನ್ನು ಹೆಚ್ಚಿಸುವ ದಿಕ್ಕಿನಲ್ಲಿ ಮಹತ್ವದ ಹೆಜ್ಜೆಯಾಗಿದ್ದು, ಈ ಸಾಧನೆಗೆ ಶ್ರಮಿಸಿದ ಸಾಮಾಜಿಕ ಜಾಲತಾಣ ಸಂಪಾದಕ ಮಂಡಳಿಗೆ ಹೃತ್ಪೂರ್ವಕ ಅಭಿನಂದನೆಗಳು. ಅಧಿಕಾರದ ಮೊದಲ ಮೂರು ತಿಂಗಳುಗಳಲ್ಲಿ ಈ ಹೊಸತನಗಳು ಯಶಸ್ವಿ ಹೆಜ್ಜೆಗಳಾಗಿ ಮೂಡಿವೆ
ನಮ್ಮ ಸ್ವಂತ ನಿವೇಶನದಲ್ಲಿ ನಿರ್ಮಾಣವಾಗುತ್ತಿರುವ ಆಡಳಿತ ಕಚೇರಿಯ ಕಾಮಗಾರಿ ಭರದಿಂದ ಸಾಗುತ್ತಿದೆ. ಈ ಮಹತ್ವಾಕಾಂಕ್ಷಿ ಕಾರ್ಯವನ್ನು ಪೂರ್ಣಗೊಳಿಸಲು ನಮ್ಮೆಲ್ಲರ ಸಹಕಾರ ಮತ್ತು ಆರ್ಥಿಕ ಬೆಂಬಲ ಅಗತ್ಯವಾಗಿದೆ. ಯುವವಾಹಿನಿ ಯುವಜನತೆಯ ಉತ್ಸಾಹಕ್ಕೆ ವಿವೇಕವನ್ನು ಬೆಸೆದ ಚಲನೆ ಆಗಲಿ. ಯುವಸಿಂಚನ ಆ ಚಲನೆಯ ಚಿಂತನೆಗಳನ್ನು ಕಾಲದ ಪುಟಗಳಲ್ಲಿ ದಾಖಲಿಸುವ ವಿಶ್ವಾಸಾರ್ಹ ಸಾಕ್ಷಿಯಾಗಲಿ. ಸಂಸ್ಥೆಯ ಧ್ಯೇಯ ಮತ್ತು ಗುರಿಗಳನ್ನು ಸಾಧಿಸುವ ನಿಟ್ಟಿನಲ್ಲಿ, ನಾವು ಎಲ್ಲರೂ ಒಂದಾಗಿ ಸಂಘಟಿತರಾಗಿ ಸೇವೆ ಸಲ್ಲಿಸಿ, ನಮ್ಮ ಪಯಣವನ್ನು ಹೊಸ ದಿಕ್ಕಿನತ್ತ ಕೊಂಡೊಯ್ಯೋಣ
ಈ ಸಂದರ್ಭದಲ್ಲಿ, ಈ ಸಂಚಿಕೆಯನ್ನು ಅತ್ಯುತ್ತಮವಾಗಿ ರೂಪುಗೊಳಿಸಿ, ಸಾಹಿತ್ಯದ ಮೆರಗು ಮತ್ತು ವಿಚಾರಗಳ ಗಂಭೀರತೆಯನ್ನು ಸಮನ್ವಯಗೊಳಿಸಿದ ಯುವಸಿಂಚನ ಸಂಪಾದಕ ಬಳಗದ ಶ್ರಮವನ್ನು ಹೃತ್ಪೂರ್ವಕವಾಗಿ ಶ್ಲಾಘಿಸುತ್ತೇನೆ. ಅವರ ಪರಿಶ್ರಮ ಮತ್ತು ಸಮರ್ಪಣೆಯೇ ಈ ಪತ್ರಿಕೆಯನ್ನು ಮತ್ತೊಂದು ಮಟ್ಟಕ್ಕೆ ಕೊಂಡೊಯ್ದಿದೆ ಎಂಬುದರಲ್ಲಿ ಸಂಶಯವಿಲ್ಲ.
ವಂದನೆಗಳೊಂದಿಗೆ
ಅಶೋಕ್ ಕುಮಾರ್ ಪಡ್ಪು
ಗೌರವ ಸಂಪಾದಕರು
ಯುವಸಿಂಚನ ಪತ್ರಿಕೆ
