ತುಳುನಾಡ್ ತುಳುಭಾಷೆಗ್ ಭಾರೀ ಪಿರಾಕ್‌ದ ಇತಿಹಾಸೊ ಉಂಡು. ಕರ್ನಾಟಕದ ಅಂಚನೆ ಭಾರತೊದ ಸಂಸ್ಕೃತಿಗ್ ತುಳುನಾಡ್‌ದ ಕೊಡುಗೆ ಮಸ್ತ್ ಉಂಡು. ಭಾರಿ ವಿಶಿಷ್ಟತೆನ್ ಪಡೆಯಿನ ಈ ಪೊರ್ಲು ತುಳುನಾಡ್, ಈ ನಡುಟ್ಟು ಬೇತೆ ಭಾಷೆಲೆನ ಬಿರುಗಾಳಿ ಏತ ಜೋರುಡು ಬೀಜಿಂಡಲಾ ೨೦೦೯ನೇ ಇಸವಿಡ್ ಉಜಿರೆಡ್ ನಡೆತಿನ ವಿಶ್ವ ತುಳು ಸಮ್ಮೇಳನೊಡ್ದು ಬೊಕ್ಕ ತುಳುಭಾಷೆ, ತುಳುವೆರೆನ ಆಚಾರ-ವಿಚಾರ, ತುಳುವ ಸಂಸ್ಕೃತಿ, ಸಂಪ್ರದಾಯೊಳೆಗ್ ಒಂಜಿ ಪೊಸ ದೇಕಿ ಬತ್ತಂಡ್. ಒಂಜಿ ರೀತಿಡ್ ಆನೆ ಬಲ ಬತ್ತಿಲೆಕ್ಕ ಆಂಡ್. ನಮ್ಮ ತುಳುವ ಸಂಸ್ಕೃತಿದ ಆಚಾರ-ವಿಚಾರೊಲು ಉಂತ್ತಿನ ನೀರಾಯೆರೆ ಬಲ್ಲಿ, ಪರಪುನ ತುದೆ ಆವೊಡು. ನಮ್ಮ ಹಿರಿಯೆರೆನ ಆಚಾರೊಲು ನನ ಆತ್ ಒರಿಯೊಡು ಪನ್ಪಿ ಬೇಲೆ ಸುರು ಆಯಿನೆಟ್ಟ್ ಇನಿ ವಿಶ್ವೊಡೇ ತುಳುಕ್ಕು ಮಲ್ಲ ಮಾನಾದಿಗೆ ಉಂಡು. ಬೊಂಬಾಯಿ, ಮಸ್ಕತ್, ಬೆಹರಿನ್, ದುಬೈ ಇಂಚ ಮಾತಾ ಊರು, ಪರವೂರುಡ್ಲಾ ತುಳುತ್ತ ಮಸ್ತ್ ಬೇಲೆ ನಡತೊದುಂಡು. ಆಂಡ ಇನಿ ಅಧುನಿಕತೆ ಬೊಕ್ಕ ಜಾಗತೀಕರಣ ಬುಳೆಯಿಲೆಕ್ಕನೆ ಮೊಬೈಲ್, ವಾಟ್ಸಪ್‌ದ ಯುಗೊಟ್ಟು ತುಳು ಭಾಷೆ ಬೊಕ್ಕ ನಮ್ಮ ದುಂಬುದ ಪದ್ದೆಯಿ ಬಂಗಾರ್, ತುತ್ತೈತ ಒಂಜಿ ಸವಾಲೇ ಆದ್ ನಮ್ಮ ದುಂಬು ಉಂಡು. ಭೌತಿಕ ಸಂಸ್ಕೃತಿಯಾಯಿನ ಈ ತುತ್ತೈತ ಇತ್ತೆದ ಜನನೆರ್‍ನ, ಈ ಪೊಸ ಯುಗೊಟ್ಟು ಎಂಚ ಉಂಡು, ಅಂಚನೆ ನಮ್ಮ ಪಿರಾಕ್‌ದ ಕಾಲೊಡು ಎಂಚ ಇತ್ತೆಂಡ್ ಪನ್ಪಿನೆನ್ ಒಂತೆ ತೆರಿಗ.
ಮನುಷ್ಯನ ಮೂಲಭೂತ ಅವಶ್ಯಕತೆಟ್ಟ್ ನಮ್ಮ ತುತ್ತೈತಲಾ ಒಂಜಿ. ನಾಗರಿಕತೆ ಶುರು ಆನಗ, ನರಮಾನಿ ತನ್ನ ಶರೀರ ರಕ್ಷಣೆ ಬೊಕ್ಕ ಮಾನಮುಚ್ಚರೆ ಮರತ್ತ ಇರೆ, ಮರದ ಚೋಳಿ, ಮುರ್ಗದ ಚರ್ಮ, ಬೊಕ್ಕ ಏತೋ ರೀತಿ ರಿವಾಜ್‌ಲೂ ಬದಲಾವಣೆ ಆದ್ ಕುಂಟು ತುತ್ತುನ, ಅಂಗಿ ಪಾಡುನ ಸುರು ಆಂಡ. ತುಳುನಾಡ್ ಸರ್ವಧರ್ಮಲೆನ ಬೂಡು. ಬೆರಣೆರ್, ಬಂಟೆರ್, ಬಿರುವೆರ್, ಜೈನೆರ್, ಗೌಡೆರ್, ಮರಕಾಲೆರ್, ಮೂಲ್ಯೆರ್, ಮುಂಡಾಲ, ನಲ್ಕೆ, ಕೊರಗೆರ್, ಬ್ಯಾರ್‍ಲು, ಇಂಚ ಪ್ರತಿ ಜಾತಿಗ್‌ಲಾ ಅಕ್ಲೆನನ್ನೇ ಆಯಿನ ತುತ್ತೈತದ ಪೊರ್ಲು ಪೊಲಿಕೆ ಉಂಡು. ಬೊಕ್ಕ ಐತನೇ ಆಯಿನ ಮರ್ಯಾದೆ ಉಂಡು. ಒಂಜಿ ಯೆಡ್ಡೆ ದೇಕಿ ಉಂಡು. ಒರಿಯನ ವ್ಯಕ್ತಿತ್ವೊನು ತೋಜಾವುನೇ ಆಯನ ತುತ್ತೈತ.
ತುಳುನಾಡ್‌ದ ಪೊಣ್ಣು ಪೊಂಜೊವುಲೆನ ಪಾರಂಪರಿಕ ತುತ್ತೈತ ಸೀರೆ. ಇನಿ ನೈಟಿ, ಚೂಡಿದಾರ್, ನೈಟ್‌ಡ್ರೆಸ್ ಕೂಡೊಂಜಿ ಬೊಕ್ಕೊಂಜಿ ದಾದ ಇತ್ತ್ಂಡಲಾ ನಮ್ಮ ಅಮ್ಮ, ಅಜ್ಜಿನ ಕಾಲೊಡು ಮಾತಾ ಪೊಂಜುವುಲು ಸೀರೆನೇ ತುತ್ತೊಂದು ಇತ್ತೇರ್. ಸಂಸ್ಕೃತೊಡು ಬೇರ ಪಂಡ ತುತ್ತುನಂಚಿನ ಉದ್ದದ ಒಂಜಿ ಕುಂಟು. ಅವ್ವೆ ಬೊಕ್ಕ ಸಾಡಿ, ಸಾರಿ, ಸೀರೆ ಆಂಡ್. ದುಂಬುದ ರಾಜ ಮಹಾರಾಜರೆನ ಕಾಲೊಡು ಆನ್ ಬೊಕ್ಕ ಪೊಣ್ಣು ರಡ್ಡ್ ಜನಲಾ ಕಚ್ಚೆ ಪಾಡೊಂದು ಇತ್ತೆರ್. ಕುದುರೆ ಸವಾರಿ ಮಲ್ತೊಂದು, ಲಡಾಯಿದ ಕಳಕ್ ಪೋವೊಂದಿತ್ತೆರ್. ರಾಣಿ ಅಬ್ಬಕ್ಕ ಬೊಲ್ದುದ ಪರ್ತಿದ ಸೀರೆ ತುತ್ತೊಂದು ಸಿಪಾಯಿಲೆನ ಒಟ್ಟಿಗೆ ಪೋವೊಂದು ಇತ್ತಳ್ಂದ್ ಉಲ್ಲೇಖ ಮಲ್ತ್‌ದೆ. ಸಿಂಧೂ ಕಣಿವೆದ ನಾಗರೀಕತೆ ಓದುಂಡ ಅಪಗಲಾ ಪೊಂಜೊವುಳೆನ ತುತ್ತೈತ ಸೀರೆ. ೧೪ನೇ ಶತಮಾನೊಡು ಪ್ರತಿಷ್ಠಿತ ವಿಜಯನಗರದ ಆನ್ ಬೊಕ್ಕ ಪೊಣ್ಣು ಲಿಂಗಬೇಧ ಉಪ್ಪಂದೆ ಸೀರೆ ತುತ್ತೊಂದಿತ್ತೆರ್, ಅಂಚನೆ ೧೫೩೫ಟ್ಟ್ ಶ್ರವಣ ಬೆಳಗೊಳದ ಗೋಡೆಡ್ ಬರೆತಿನ ತೈಲ ಚಿತ್ರೊಡು ಅಂಜೊವುಲು ಸೀರೆ ತುತ್ತೊಂದಿತ್ತೆರ್ ಪಂಡ್ದ್ ತೋಜಿದ್ ಬರ್‍ಪುಂಡು. ನನ ದಕ್ಷಿಣ ಭಾರತೊಡು, ಅಯಿಟ್‌ಲಾ ದಕ್ಷಿಣ ಕನ್ನಡ ಉಡುಪಿದ ನಮ್ಮ ತುಳುನಾಡ್‌ದ ಪೊಣ್ಣುಲು ತುತ್ತುನ ಸೀರೆದ ಪೊರ್ಲುನು ಪನಿಯರೇನೇ ಸಾಧ್ಯ ಇಜ್ಜಿ.
ಪೊರ್ಲುದ ಸೀರೆ ತುತ್ತುದ್ ಐಕ್ ಬೋಡಾಯಿ ಪದ್ದೇಯಿ ಬಂಗಾರ್ ಪಾಡಿಯಾಳ್‌ಡಾ ಅಲೆನ ಪೊರ್ಲು ಪೊಲಿಕೆನ್ ತೂಯರೆ ರಡ್ಡ್ ಕಣ್ಣೇ ಯಾವಂದ್. ಅಂಚನೆ ನಮ್ಮ ವಿಶಿಷ್ಟ ತುತ್ತೈತೊಡೇ ನಮನ್ ಜನ ತುಳುನಾಡ್‌ದಾಕ್ಲು ಪಂಡ್ದ್ ಗುರುತಿಸವೇರ್. ನಮ್ಮ ಇಲ್ಲದ ಅಂಜೊವ್ನ, ಹಿರಿಯೆರ್‌ನಕುಲು ಬೊಲ್ದುದ ವೇಸ್ಟಿ, ತರೆಗೊಂಜಿ ಮುಂಡಾಸ್, ಬೊಲ್ದು ಪೈರಾನ್ ಪಾಡ್ದ್ ಪುಗೇಲ್‌ಗ್ ಶಾಲ್ ಪಾಡ್ದ್ ಪಿದಾಡ್ದ್ ಮದಿಮೆಗೋ, ಜಾತ್ರೆಗೋ, ಕಂಬುಳೊಗೋ, ದೇವಸ್ಥಾನೊಗೋ ಪೋಪೆರ್ ಪಂಡ್ದೇ ಅರ್ಥ. ಊರುಡ್ದು ಊರುಗು, ರಾಜ್ಯೋಡ್ದು ರಾಜ್ಯೋಗು ಈ ತುತ್ತೈತದ ಪೊರ್ಲುನು ಒರಿಪಾಯಿನಕುಲು ಕೊಡವೆರ್ ಪಂದ್ ಕೊಡುಗುದಕುಲು. ಅಕುಲು ಎಂಚಿನ ಬದಲಾವಣೆದ ಗಾಳಿ ಬೀಜಿಂಡಲಾ ಮದಿಮೆ, ಹುತ್ತರಿ ಪರ್ಬದಂಚಿನ ಅಕ್ಲೆ ಸಂಪ್ರದಾಯದ ಪರ್ಬೊಡು ಅಕ್ಲೆನ ಸಂಪ್ರದಾಯದ ಕೊಡವ ತುತ್ತೈತೊನೇ ಪಾಡುನ ನಮ ತೂಪ. ಅಂಚನೇ ಕೇರಳ ಈ ಸಾಲಗ್ ಸೇರುಂಡು. ತಮಿಳೆರ್, ತೆಲುಗೆರ್, ಗುಜರಾತಿಲು,ಮರಾಠಿ, ಬಂಗಾಳಿಲು, ಉತ್ತರ ಭಾರತದಕುಲು, ಪರದೇಶದಕುಲು ಮಾತಾ ಸೀರೆನೇ ತುತ್ತುವೆರ್. ದುಂಬು ಇಡೀ ಮೈಮುಚ್ಚುನ ಸೀರೆ, ಬೊಕ್ಕ ಇಡೀ ಕೈತ ರಾಕೆ ಪೊಣ್ಣನ ಮಾನ ಮುಚ್ಚುನ ಸಾಧನ ಆವೊಂದಿತ್ತಂಡ್. ಆಂಡ ಇನಿ ನಮ್ಮ ಪೊಣ್ಣುಲು ಸೀರೆ ತುತ್ತುನೆಟ್ಟ್ ಮಾತಾ ವೈವಿಧ್ಯ ಬೊಕ್ಕ, ಪೊಸತನ ಬೈದಂಡ್. ಮದ್ಮೆ, ಇಲ್ಲ್ ಒಕ್ಕೆಲ್, ಪೂಜೆ, ಇಂಚಿನ ದೈವ, ದೇವತಾ ಸಾಂಸ್ಕೃತಿಕ ಕಾರ್‍ಯೊಲೆಡ್ ಪೊಣ್ಣು ಸೀರೆ ತುತ್ತೊಡು ಪನ್ಪಿ ಸಂಪ್ರದಾಯ ನಂಬಿಕೆ ಇನಿಕ್ಲಾ ಉಂಡು. ಇನಿ ಜೀನ್ಸ್, ಮಿಡಿ, ಲೆಗ್ಗೆನ್ಸ್, ಪಾಡುನ ಪೊಣ್ಣುಲು ಮದಿಮೆಗ್, ಪೊಣ್ಣು ತೂಪುನ ಎಡ್ಡೆ ಕಾರ್ಯೊಗು ಸೀರೆ ತುತ್ತೊಂದು ಸಂಭ್ರಮ ಪಡ್‌ಪೆರ್. ನಿಶ್ಚಿಯ, ಮದಿಮೆ, ಬಯಕೆದ ಲೇಸ್‌ಡ್ ಸೀರೆಗುಪ್ಪುನ ಮರ್ಯಾದೆ (ಮರ್‍ಯಾದಿ) ಬೇತೆ ವಾ-ಬಂಗಾರ ಪದ್ದೇಯಿಗ್‌ಲಾ ಇಜ್ಜಿ. ಶುಭ ಕಾರ್ಯೊಗು ಸೀರೆ ದೆಪ್ಪೆರೆ ಪೋಪಿನ ಸಂಪ್ರದಾಯೊಗು ಮಸ್ತ್ ಮಹತ್ವ ಉಂಡು. ಮದಿಮಲೆನ ಸೀರೆದ ಒಟ್ಟಿಗೆ ತೊಡುಗೆ ಪಂಡ ಬಂಗಾರ್, ಕ್ಲಿಪ್, ಪರ್ಸ್, ಕಾಜಿ, ಜೋಡು, ಬೊಟ್ಟು ಉಂದು ಮಾತಾ ಬೋಡು. ಒಟ್ಟಾರೆ ಪನ್ಪುನಾಂಡ ನಮ್ಮ ಸಂಸ್ಕೃತಿಡ್ ಸೀರೆಗ್ ತಿಕ್ಕಿನ ಸ್ಥಾನಮಾನ, ಗೌರವ ಬೇತೆ ವಾ ತುತ್ತೈತೊಗುಲಾ ತಿಕ್ಕ್‌ದಿಜಿ.
ಅಂಚೆನೇ ಪಿದಾಯಿ ದೇಶದ ಪೊಂಜೊವುಲಾ ನಮ್ಮ ಈ ಪೊರ್ಲುದ ಸೀರೆಗ್ ಮರ್‍ಲ್‌ದ್ ಪೋತೆರ್. ಸೀರೆ ಮಾತ್ರ ಅತ್ತ್ ಸೀರೆದ ಸೆರಂಗ್ ಪಂಡ ಮೇದಲೆದ ಉಪಯೋಗ ಪನ್ಯೆರೆ ಪೋಂಡ ಮಸ್ತ್ ಉಂಡು. ಚಳಿಕ್ ಪೊದೆತೊನೊಲಿ, ಸೆಕೆಕ್ ಗಾಳಿಪಾಡೋಲಿ, ದೊಂಬುದ ರಯಿಕ್ಕ್ ತರೆಕ್ ಪಾಡೊನೊಲಿ, ತೆರಿಯ ಕಟ್ಟ್‌ದ್ ತುಂಬುನ ಪುದೆತ್ತಡಿಕ್ಕ್ ತೆರಿಯ ಮಲ್ತ್ ದೀವೊನೊಲಿ. ಅಂಚನೆ ದ್ರೌಪದಿನ ಮೆದಲೆಗೆ ಕೈಪಾಡಿನ ದುಶ್ಯಾಸನೆ, ಸೀತೆನ ಮೆದಲೆಗ್ ಕಣ್ ಪಾಡಿನ ರಾವಣೆ, ಉಂದು ಪೂರಾ ಇತಿಹಾಸೊಡು ಕಥೆ ಆತಿನವು ನಂಕ್ ಗೊತ್ತುಂಡು. ಆಂಡ ಇನಿ ಮೇದಲೆ ಬೊಕ್ಕ ಸೀರೆ ಕಣ್ಣ ಮದೆ ಆವೊಂದುಂಡು. ತಿಗಲೆ ಮರತೊಂದು ಮರ್ಜಿದ ಮೆದಲೆ ತೀರ್ತ್ ಬೂರಾಂದಿಲೆಕ ಜಾಗ್ರತೆ ಮಲ್ಪೊಲೆ. ಮಾನ-ಮರ್ಯಾದೆದ ಸಂಕೇತ ಈ ಮೆದಲೆಂದ್ ಮರಪೊರ್ಚಿ. ಮೆದಲೆ ಪೊಣ್ಣು ಜಾತಿದ ಮಾನೊಗೊಂಜಿ ಕನೆತ್ತ ಮುಳ್ಳದ ಬೇಲಿದಲೆಕ್ಕ.
ತುತ್ತೈತದ ಪೊರ್ಲು ಏಪಲಾ ಮಾಜೆರೆ ಬಲ್ಲಿ. ನಮ್ಮ ಸಾಂಪ್ರಾದಾಯಿಕ ತುತ್ತೈತದ ಒರುಟ್ಟು ನಮ್ಮ ಲತ್ತ್ ಜವನೆರ್ ಮಸ್ತ್ ಪ್ರೀತಿ ತೋಜಾವೊಂದುಲ್ಲೆರ್. ಮದಿಮೆದ ಲೇಸ್‌ಡ್ ಒಂಜೇ ಲೆಕ್ಕದ ಅಂಗಿ, ಲುಂಗಿ ಪಾಡ್ದ್ ಪೊಣ್ಣುಲೆನ ಕಣ್ಣ್‌ಗ್ ಹೀರೋ ಲೆಕ್ಕ ಪೋಸು ಕೊರ್ಪಿನ ಪ್ರಯತ್ನ ಆವೊಂದುಂಡು. ತುತ್ತೈದೊಡು ಆಕಾಶೊಡು ವಿಮಾನೊಡು ಪೋಪಿನಕುಲು ಅವು ಗೌರವ ಪನ್ಪಿ ಭಾವನೆ ಇನಿಕ್ಲಾ ಉಂಡು. ತುತ್ತೈತೊನು ಇನಿ ಒರಿಪಾವುನ ಬಿರುಟ್ಟು ಮಸ್ತ್ ಸಂಘಟನೆಲು ನಂಕ್ ತೆರಿಯಂದಿಲೆಕ್ಕ ಕೆಲಸ ಮಲ್ತೊಂದುಂಡು. ಯುವವಾಹಿನಿ, ಯುವಕ ಮಂಡಲ, ಯುವತಿ ಮಂಡಲ, ತುಳುನಾಡ್‌ದ ಪರ್ಬ, ಸಮಾವೇಸಲೆಡ್, ಮೆರವಣಿಗೆ, ಜಾಥಾ ಮುಲ್ಪ ವಸ್ತ್ರಸಂಹಿತೆಗ್ ಮಸ್ತ್ ಮರ್ಯಾದೆ ಉಂಡು.
ಸೀರೆಡೇ ಪೊಣ್ಣುಲು, ಅಂಚೆನೇ ಅಂಜೊವುಲು ಬೊಲ್ದು ಅಂಗಿ, ವೇಸ್ಟಿ, ಶಾಲ್ ಪಾಡ್ದ್ ಮೆರವಣಿಗೆ, ಜಾತೊಡು ಪಾಲು ಪಡೆಯುನ ನಮ ತೂಪ. ಅಂಚೆನೆ ಹೈಟೆಕ್ ಬಂಗಾರದ ಅಂಗಡಿಲೆಡ್, ಆಸ್ಪತ್ರೆಲೆಡ್, ಕಾರ್ಪೊರೇಟ್ ಸಂಸ್ಥೆ, ವಿಮಾನದ ಗಗನಸಖಿನಕುಲು, ಹೈ-ಪೈ ಶಾಲೆ, ಕಾಲೇಜಿಲೆಡ್ ಸೀರೆನೇ ತುತ್ತೈತ ಕಡ್ಡಾಯವಾದುಂಡು. ಇಂಜಿಪಾದ ಮದಿಮಲೆಡ್ ತೂಂಡ ಸುರುಕ್ಕು ಮದಿಮಾಯೆ ಸಂಪ್ರದಾಯಿಕ ಪೇಟ-ಪಗಡಿ, ಮುಂಡಾಸ್ ಪಾಡ್ದ್ ಬಾರಿ ಗೌಜಿ ಗಮ್ಮತ ಮಲ್‌ಪುನೆನ ತೂಪ, ಕಾಲ ಏತೇ ಬದಲಾವಣೆ ಆಂಡಲಾ ಪೊಸ ಕಾಲದ ಒಯಿಲ್ ನಮ್ಮ ಸೀರೆ, ಲುಂಗಿ, ಉದ್ದದ ಲಂಗ, ಈ ಸಂಪ್ರದಾಯಿಕ ತುತ್ತೈತೊನು ಕೊನೊತಿಜಿ. ಉಂದು ನಮ್ಮ ಮಣ್ಣದ ಗಟ್ಟಿತನೊಗೊಂಜಿ ಸಾಕ್ಷಿ. ಈ ಮಣ್ಣ್‌ದ ಗುಣ ಉಂದು. ಯುಗ-ಯುಗೊಕುಲು ಕರಿಂಡಲಾ ನಮ್ಮ ಸೀರೆ, ವೇಸ್ಟಿ, ಲುಂಗಿ ಒರಿಯಡ್, ನಮ್ಮ ಅಭಿರುಚಿ, ಅಭಿಪ್ರಾಯ, ಸಾಧನೆ, ಒಟ್ಟಾರೆ ವ್ಯಕ್ತಿತ್ವೊನು ದೆರ್ತ್ ತೊಜಾವುನ ತುತ್ತೈದೊಳೆನ್ ನಮ ಮರಪಾಂದೆ ಕಾತೊಂದು ಬರ್ಕ. ನಮ್ಮ ಸಂಪ್ರದಾಯದ ಸಂಸ್ಕೃತಿದ ತುತ್ತೈತೊನು ಜವನೆರ್ ಮರಪಾಂದೆ ಕಾತೊಂದು ಬರಡ್‌ಪನ್ಪಿ ಆಶಯ.
ಮೇಡ ಮ್ಇರೆನ ಕಾಳಜಿಗ್ ಸೊ ಲ್ಮೆಲು.