ಬಿರ್ಮಣ ಬೈದನ ಬೆರಿಯೆ ಬತ್ತೆನಾ ಕೊಡಮಣಿತ್ತಾಯೆ…

ಬಿಲ್ಲವರು ಎಲ್ಲೂ ಸಲ್ಲುವರಯ್ಯಾ…ಪನ್ಪಿ ಪಾತೆರೊಗು ಸತ್ಯ ಒದಗಾದ್ ಕೊರಿ ಲೆಕಾನೆ ಈ ತುಳುನಾಡ್‍ಡ್ ಬಿರ್ವೆರ್ ಕೈ ಪಾಡಂದಿ ಕಾರ್ಯ ಇಜ್ಜಿ. ಬಿರ್ವೆರ್ ಇಜ್ಜಾಂದೆ ಲೇಸ್ ಇಜ್ಜಿ. ಕಂಡ ಸಾಗೊಲಿ, ಮೂರ್ತೆ, ದೈವೊದ ಪಾತ್ರಿ, ಮುಕ್ಕಾಲ್ದಿ, ವೈದ್ಯೆರಾದ್ ಪುರಪ್ಪು ಪಡೆಯಿನ ಪತ್ತ್ ಪದಿನಾಜಿ ಉದಾರ್ನೆ ನಂಕ್ ತಿಕ್ಕುಂಡು .ಅಂಚನೆ ನಯ ವಿನಯೊಡು ತಗ್ಗಿ ಕಂಡೊಗು ಮೂಜಿ ಬುಳೆಗೆ ಪನ್ಪಿಲೆಕಾನೆ ಸ್ವಾಮಿಗ್ ಭೂಮಿಗ್ ತಗ್ಗ್ ದ್ ಬಗ್ಗ್ ದ್ ನಡತ್ತಿನೇಡ್ದಾವರನೆ ಈ ತುಳುನಾಡ್‍ಡೆ ಎಚ್ಚಿನ ದೈವೊಲು ಬಿರ್ವೆರೆ ಬೆರಿ ಪತೊಂದೆ ಈ ಭೂಮಿಡ್ ಗೋಚರೊಗು ಬೈದ ಪಂಡಲಾ ತಪ್ಪಾವಂದ್…

ನಮ್ಮ ಕೈಟ್ಟಿತ್ತಿನ ಕಿನ್ನಿ ಬಿರೆಳ್ ಬಜೀಕಿನ್ಯ. ನಮ್ಮ ಎಚ್ಚಿನ ವಾ ಬೇಲೆಗ್‍ಲಾ ಬರಂದೆ ಒಂಜಿ ಬರೀಟ್ ಉಪ್ಪುನ ಬಿರೆಳೇ ಅವು ಕಿನ್ನಿ ಬಿರೆಳ್. ಆಂಡ ನಮ ದೇವೆರೆ ಎದುರು ಉಂತುದು ಕೈ ಮುಗ್ಗಿನಗ ನಮ್ಮ ಕಿನ್ನಿ ಬಿರೆಳ್‍ಗೆ ದೇವರ್ ಬಾರೀ ಮುಟ್ಟಡ್ ಇತ್ತ್‍ದ್ ಒರಿನ ನಾಲ್ ಬಿರೆಳ್‍ಡ್ದ್‍ಲಾ ಕೈತಲ್‍ಡ್ ದೇವೆರ್ ದರ್ಶನ ಕೊರ್ಪೆರ್‍ಗೆ. ಈ ತುಳುನಾಡ್‍ಡ್ ದೈವ ದೇವೆರ್ ಒಲಿದ್ ಬೈದಿನಿಲಾ ಅಂಚನೆ ಹಿಂದುಳಿದ ವರ್ಗೊದ ಬಿರ್ವೆರೆಗ್. ಅತ್ತ್‍ಂಡ ದುರ್ಬಲೆರ್ ಆಯಿನ ಮನ್ಸೆರೆಗ್ (ಹರಿಜನ) ನಮ ಭಕ್ತಿ ಭಾವನೆಗ್ ಕಿನ್ನಿ ಬಿರೆಳ್ ಆವೊಡತ್ತಂದೆ ಶಕ್ತಿ ಸಾಮಥ್ರ್ಯೊಡು ನಮ ಏಪಲಾ ಕೊಂಬ ಬಿರೆಲಾದೆ ಮೆರೆವೊಡು. ಪಂದ್ ಎಲ್ಯ ಪೀಠಿಟಿ ಕೊರೊಂದು ಬಿರ್ವೆರೆಗ್ ಮನ್ಸಗ್ ಒಳಿದ್ ಬತ್ತಿನ ನಮ್ಮ ಬಿರ್ವೆರೆ ಕುಲೊತ್ತ ಕಾರಣೀಕ ಪುರುಷೆರ್ ಕೋಟಿ ಚೆನ್ನಯೆರೆಗ್ ದೂತೆಯಾದ್ ಬತ್ತಿನ ನಮ್ಮ ದೈವ ಕೊಡಮಣಿತ್ತಾಯನ ಕಥೆನ್ ಎಲ್ಯ ಬರವುದ ರೂಪೊಡು ನಿಕ್ಲೆ ಎದುರು ದೀವೊಂದುಲ್ಲೆ.
ತುಳುವ ನಾಡ್‍ಡ್ ಬೆಳ್ತಂಗಡಿ ತಾಲೂಕುದ “ಗುಂಡೀರ ಕೊಡಂಗೆ ಬರ್ಕೆ” ಪನ್ಪಿ ಒಂಜಿ ಬಿರ್ವೆರೆ ಗುತ್ತುದ ಇಲ್ಲ್ ಇತ್ತ್‍ಂಡ್‍ಗೆ ತನ್ನ ಹಿರಿಯಕ್ಲೆಡ್ದ್ ಬಳುವಳಿಯಾದ್ ಬತ್ತಿಂಚಿ ಕಂಗ್ ತಾರೆ ಬಾರೆದ ತೋಟ, ಮೂಜಿ ಬುಳೆ ಮಲ್ಪಿಂಚಿಂತ್ತಿ ಸಾಗೊಲಿದ ಕಂಡೊಲು ಇತ್ತ್‍ಂಡಲಾ ಒಂಜಿ ಕೋಡಿಡ್ ಪಾರ್ ಪಡೀಲ್ ಬೂರುನಾತ್ ಒಂಜಾತ್ ಭೂಮಿ ಇತ್ತ್‍ಂಡಲಾ ತನ್ನ ವಂಶ ಪರಂಪರೆಯಾದ್ ಬೈದಿನ ತನ್ನ ದೈವ ಚಾಕ್ರಿನ್ ಒಂಜಿ ಕುಜಲ್‍ದಾತ್‍ಲಾ ತಪ್ಪಾವಂದೆ ಮಲ್ತೊಂದು ಪೋಪಿನಾರೆ ಈ ಇಲ್ಲದ ಇತ್ತೆದ ಎಜಮಾನಿ ಬಿರ್ಮಣ ಬೈದೆರ್…ಉದ್ದ ಜೀವ ಆಂಡಲಾ ಬುದ್ಧನ ಮನಸ್ಸ್‍ದಾರ್. ಕೈಟ್ ತಲವಾರ್ ಇಜ್ಜಿಂಡಲಾ ತನ್ನ ತಲವಾರ್ ಮೀಸೆಗೆ ಪೋಡಿಯುನ ಊರುದ ಜನೊಕ್ಲು. ಕೆಂಪು ಕಣ್ಣ್‍ದಾರ್‍ಂದ್ ಊರುದ ಜನೊಕ್ಲು ಪಂಡೆರ್‍ಂಡಲಾ ತಂಪುದ ತನ್ನ ಪಾತೆರೊಡು ನೆರೆಕರೆಟ್ಟ್., ಊರುಡು ವಾ ಸಮಸ್ಯೆ ಇತ್ತ್‍ಂಡಲಾ ಇತ್ಯರ್ಥ ಮಲ್ಪುನ ಮಲ್ಲ ಗುಣೊತ್ತ ನರಮಾನಿಯೆ ನಮ್ಮ ಬಿರ್ಮಣ ಬೈದ್ಯೆರ್…
ತನ್ಕ್ ತನ್ನ ಹಿರಿಯೆರೆಡ್ದ್ ಬೈದಿನ “ಮುಕ್ಕಾಲ್ದಿ” ಬೇಲೆನ್ ಬಾರೀ ಶ್ರದ್ಧೆ ನಿಷ್ಠೆಡ್ ನಡಪಾವೊಂದು ಬತ್ತಿನಾರ್. ಇಂಚನೆ ಒಂಜಿ ದಿನ ತನ್ನ ಊರುದ ಎದುರುಡುಪ್ಪುನ ಬಡಗಣ ಗಂಗೆ ಪನ್ಪಿಂಚಿ ಒಂಜಿ ಎಲ್ಯ ತುದೆ ದಾಂಟ್‍ದ್ ಅಲ್ಪ ನಡಪುನ ವರ್ಷೊದ ಜಾತ್ರೆ ತೂಯೆರೆ ತನ್ನ ನಾಲ್ ಜನ ದೋಸ್ತಿನಕ್ಲೆನ್‍ಲಾ ಲೆತೊಂದು ಜಾತ್ರೆಗ್ ಪೋಪೆರ್. ಅಲ್ಪ ದೇವೆರೆ ಬಲಿ ಸೇವೆ ಆಯಿಬೊಕ್ಕ ಪರಿವಾರ ದೈವೊಲೆ ನೇಮ ಆಪುಂಡು. ಸುರೂಟು ಆಯಿಂಚಿ ದೈವೊದ ಬಾರೀ ಕಾರಣೀಕ ತೋಜಾಯಿನ ದೈವೊದ ನೇಮ ಮುಗಿಲೆಕಾನೆ ಮುಕ್ಕಾಲ್ದಿ ಬಿರ್ಮಣ ಬೈದೆರ್ ತನ್ನ ಪರಿವಾರೊದೊಟ್ಟಿಗೆ ಅಲ್ಪಡ್ದ್ ಗಂಧ ಬೂಲ್ಯ ದೆತೊಂದು ಪಿದಾಡ್ನಗ ತನ್ನ ಉಡಲ್ ದುಲಾಯಿಡೆ ಒಂಜಿ ಎಲ್ಯ ಸಂಕಲ್ಪ ಮಲ್ಪುವೆರ್‍ಗೆ…
ಎಂಕ್ಲೆ “ಗುಂಡೀರ ಕೊಡಂಗೆ ಬರ್ಕೆ”ಡ್‍ಲಾ ಇಂಚಿತ್ತಿ ಒಂಜಿ ಕಾರಣೀಕದ ದೈವ ಇತ್ತುದುಂಡ ಎಂಕ್ಲೆ ಬರ್ಕೆದ ಇಲ್ಲಡ್‍ಲಾ ಕಾಲಾದಿ ಕಾಲೊಗು ನೇಮ ನೆರಿ ಮಲ್ಪದ್ ಪೊರ್ಲು ತೂತುವೆ. ಪಂದ್ ತನ್ನ ಉಡಲ್‍ದುಲಯಿಡೆ ಕೊರಗುವೆರ್‍ಗೆ…
ದುಂಬುದ ಕಾಲೊಡು ನ್ಯಾಯ ನೀತಿಗ್, ಸತ್ಯ ಧರ್ಮೊಗು. ಏರ್ ತರೆ ತಗ್ಗಾದ್ ನಡಪುವೆನ ಆಯನ ಲೆಪ್ಪುಗು ಬೇಗ ಓಕೊಂದು ಪಾರ್ ಬೈದಿನ ಅವು ಏತೊ ದೈವೊಲು ಇನಿಕ್ಕ್‍ಲಾ ಈ ತುಳುನಾಡ್‍ಡ್ ಮೆರೆವೊಂದುಲ್ಲೆರ್. ನಮನ್ ರಕ್ಷಣೆ ಮಲ್ಪುನ ಸಗ್ತಿಯಾದುಲ್ಲೆರ್.
ನೇಮೊದ ಜಾಲ್‍ಡ್ದ್ ಒಂಜಿ ನಾಲ್ ಬಕ್ಕರ್ ತನ್ನ ಪರಿವಾರೊದಕ್ಲೆ ಒಟ್ಟಿಗೆ ದುಂಬು ಬರೊಂದಿಪ್ಪುನಗ ಒರಿಯಗ್ ಮೈಟ್ ದೈವ ಆವೇಶ ಬರಿಯೆರೆ ಸುರು ಆಪುಂಡು. ನೇನ್ ತೂದು ಮುಕ್ಕಾಲ್ದಿ ಬಿರ್ಮಣ ಬೈದೆರ್ ಹಾಂ.. ದಾದ ಆಂಡ್… ಏರ್ ಈ…ಎಂಕ್ಲೆಡ್ದ್ ದಾದ ಆವೊಡು..ಬಾಯಿ ಬುಡು.. ಪಂದ್ ಪನ್ಪೆರ್. ಅಪಗ ಆ ದೈವ ಮೈಟ್ ಬೈದಿನ ಮಾನಿ ಬಿರ್ಮಣ ಬೈದಾ… ಎನನ್ ನಿನ್ನ ಗುತ್ತು ಬರ್ಕೆಗ್ ಲೆತ್ತೊಂಡ…ಯಾನ್ ನಿನ್ನ ಪಿರವುಡೆ ಬರ್ಪೆ, ಬರೊಲಿಯತ್ತಾ.. ಎಂಕ್ ಬಲಿ ಬೋಗ ಕೊರ್ಪತ್ತಾ…? ಇಂಚ ಪನ್ಪೆರ್.
ಆ ಪೊರ್ತುಡು ಮುಕ್ಕಾಲ್ದಿ ಬಿರ್ಮಣ ಬೈದೆರ್. ಮಾಯಕಾರ.. ನಿನ್ನ ಸಗ್ತಿ ಮಲ್ಲೆ ಎನ್ನ ಭಕ್ತಿ ಎಲ್ಯೆ. ಎನ್ನ ಬರ್ಕೆಗ್ ಬರ್ಪಂದಾಂಡ ಎಂಕ್ ಸಂತೋಷನೆ. ಆಂಡ ಅಪ್ಪೆನ ಪಿರವುಡು ಬಾಲೆ ಬತ್ತಿಲೆಕ. ಪೆತ್ತದ ಪಿರವುಡೆ ಕಂಜಿ ಪೋಯಿಲೆಕ. ತಗ್ಗ್‍ದ್ ಬಗ್ಗ್‍ದ್ ಬರ್ಪಂದಾಂಡ ಎನ್ನ ದಾಲ ಅಡ್ಡಿ ಇಜ್ಜಿ ಪನ್ಪೆರ್.
ಇಂದೆನ್ ಕೇಂದ್ ದೈವ ಪತ್ತಿದಿ ಮಾನಿ ಅಡೆಗೆ ಅಡ್ಡ ಬೂರ್ದು ರಡ್ಡ್ ನಿಮಿಷ ಆದಾನಗ ಎಚ್ಚೆರಿಗೆ ಆಪೆ. ಉಂದೆನ್ ಪೂರಾ ಸುದರಿತೊಂದು ಒಟ್ಟಿಗೆ ಇತ್ತಿನಕ್ಲೆನ್ ಲೆತೊಂದು ಬಿರ್ಮಣ ಬೈದೆರ್ ತನ್ನ ಕೈಟಿತ್ತಿ ಲಾಟನ್ ಪತೊಂದು ಬತ್ತ್ ಬತ್ತ್‍ದ್ ಅಂಗಾರೆ ಕಡಪು ಪನ್ಪಿ ಸುದನ್ ನಡತ್ತ್‍ದೆ ದಾಂಟ್‍ದ್ ಗುಂಡೀರ ಕೊಡಂಗೆ ಬರ್ಕೆದ ಬೈಲ್‍ಗ್ ಎತ್ತ್‍ನಗ ಪುಲ್ಯಲಾ ಆದಾಂಡ್. ಊರುದ ಕೋರಿಲು ಕೆಲೆಪ್ಪೆರೆಲಾ ಸುರು ಮಲ್ತ. ಗುಂಡೀರ ಕೊಡಂಗೆ ಬರ್ಕೆ ವಿಶಾಲವಾಯಿನ ಭೂಮಿ. ಬೋಡಾಯಿನಾತ್ ಅರಿಬಾರ್ ಆಪಿನ ಕಂಡೊಲು. ಕಂಗ್, ತಾರೆ, ಬಾರೆದ ತೋಟೊಲು. ಊಳಿಗೊಗು ಒಕ್ಕೆಲ್‍ದ ನಾಲ್ ಇಲ್ಲದ ಮನ್ಸೆರ್. “ಮೂಲೊದ ಮಾನ್ಯೆರ್” ಕಿದೆ ನೆಲಿಕ್ಕೆ ಕಂಜಿ ಪೆತ್ತೊಲು. ಎರು ಬೋರಿಲು. ಬಾರ್, ಬಜ್ಜೆಯಿ. ಕೈಲ್‍ನ್ ಪೇಂಟೆಗ್ ಸಾಗಯೆರೆ ರಡ್ಡ್ ಬೋರಿದ ಗಾಡಿಲು. ನೆಯಿ ಪೇರ್‍ಡೆ ಕೈ ದೆಕ್ಕುನಂಚಿತ್ತಿ ಇಲ್ಲೇ ಈ ಬರ್ಕೆದ ಇಲ್ಲ್. ಒಂಜಿ ಇಲ್ಲದಕ್ಲೆಗ್ ತಪ್ಪು ಕನಕ್ಕ್‍ದ ಬೇಲೆ. ಒಂಜಿ ಇಲ್ಲದಕ್ಲೆಗ್ ಪಜೀರ್ ಪೆರೆದ್ ಕನತ್ತ್‍ದ್ ಪೆತ್ತ ಎರ್ಮೆಲೆಗ್ ಬೊರಿಪ್ಪುನ ಬೇಲೆ. ಒಂಜಿ ಇಲ್ಲದಕ್ಲೆಗ್ ಕಂಡ ತೋಟೊಲೆಗ್ ಬೊನ್ಯ ಪಾರಾವುನ, ಕಿದೆತ್ತ ಗೊಬ್ಬರ ದೆತ್ತ್‍ದ್ ತೋಟದ ಮುದೆಲ್‍ಗ್ ಪಾಡುನ ಉಂದು ಬೇಲೆ. ನನೊಂಜಿ ಇಲ್ಲದಕ್ಲೆಗ್ ಮೂಲಿತ್ತಿನ ಮಾತಾ ಕಯಿಕಂಜಿಲೆನ್ ಮೇಪದ್ ಅವೆನ್ ಪರಪ್ಪಿ ತೋಡುಡು ದೆಕ್ಕ್‍ದ್ ಕನತ್ತ್‍ದ್ ಕಿದೆಟ್ಟ್ ಕಟ್ಟ್‍ದ್ ಐಕ್ ಬೋಡಾಯಿ ಮಡ್ಡಿ ಅರ್ಕಾಂಜಿ ಪರ್ಪಾವುನ ಬೇಲೆ.
ಮೂಲು ಕಂಜಿ ಕಯಿಕಂಜಿಲೆನ್ ಬಾರೀ ಮೋಕೆಡ ತೂಪಿನಾಯೆನೆ ಈ ಬರ್ಕೆದಮೂಲೊದ ಮನ್ಸೆ “ಪಂದಾಡ” ಪನ್ಪಿ ಪುರಪ್ಪುದಾಯೆ.
ಬರ್ಕೆದ ಇಲ್ಲದ ಎದುರುಡಿತ್ತಿನ ಬಾಕಿಮಾರ್ ಕಂಡೊಡು ಇಂಚಿಪ್ಪ ದಿನೋಲ ರಾತ್ರೆ ಬೊಲ್ಪಾವೊಡಾಂಡ ಕೈತ್ತ ಕುರಲ್ ಅಗ್ಗಿದ್ ಮಾಯಕಾಪಿನ ಒಂಜಿ ಇಸಯ ಬಿರ್ಮಣ ಬೈದೆರೆ ಗೋಚರೊಗು ಬರ್ಪುಂಡು. ಒಂಜಿ ರಡ್ಡ್ ದಿನ ಉಂದು ಕಾಡ ಪಂಜಿದ ಉಪಟಲ ಆದಿಪ್ಪೊಡು ಪಂದ್ ತಾನೇ ಬೋಂಟೆದ ಬೆಡಿ ಪತ್ತ್‍ದ್ ರಾತ್ರೆ ಕಾತ್ ಕುಲ್ಲುವೆರ್ ಊಂ..ಹುಂ… ಪಂಜಿದ ಸುದ್ದಿಯೆ ಇಜ್ಜಿ. ಮನದಾನಿ ಕಾಂಡೆ ಮೂಲೊದ ಮನ್ಸೆ ಪಂದಾಡನ್ ಲೆತ್ತ್‍ದ್. ಪಂದೊ…ಇಂದಯ. ದಿನೋಲ ರಾತ್ರೆ ನಮ್ಮ ಬಾಕಿಮಾರ್ ಕಂಡೊದ ಕೈತ್ತ ಕುರಳ್ ಪೂರಾ ಒಂಜಿ ಪಂಜಿ. ಅತ್ತ್‍ಂಡ ಒಂಜಿ ಎರ್ಮೆದ ಕಂಜಿ ಅಗ್ಗಿದ್ ಪೋಯಿ ಲೆಕ ತೋಜುಂಡು. ಅವು ದಾದಾಂದ್ ಈ ಪತ್ತೆ ಮಲ್ಪೊಡು ಪಂದ್ ಒಕ್ಕೆಲ ದಿಕ್ಕಗ್ ಬಿರ್ಮಣ ಬೈದೆರ್ ಆದೇಶ ಮಲ್ಪುವೆರ್. ಆವು ಬೈದೆರೆ. ಅವೆನ್ ಯಾನ್ ತೂವೊನುವೆ ಪಂದ್ ಪಂದಾಡೆ ಆನಿಯೆ ರಾತ್ರೆಡ್ ಬಾಕಿಮಾರ್ ಕಂಡೊದ ಕಟ್ಟಪುಣಿಟ್ಟ್ ಕೈಟೊಂಜಿ ಲಾಟನ್, ಬೆರಿಕೊಂಜಿ ಪನೋಲಿ ಪಾಡೊಂದು ಕಾತ್ ಕುಲ್ಲುವೆ. ಕೊಕ್ಕರ ಕುಲೊಂದು ಒಂಜಿ ಬೀಡಿ ಪೊತ್ತದ್ ಆ ಬೀಡಿ ಪೂರ ಪೊತ್ತುದು ಕರಿಂಚೊಡಾಂಡ ಪುಣಿ ಬರಿಟೊಂಜಿ ಎರ್ಮೆದ ಕಂಜಿ ಪಾರೊಲು ದರ್‍ಬುರ ಪಂದ್ ಕೈತ್ತ ಕುರಲ್ ಒೈತ್‍ದ್ ಅಗ್ಗಿವುನೆನ್ ಪಂದಾಡೆ ತೂಪೆ. ಇಂಚಿಡ್ ಬಾಯಿಡಿತ್ತಿನ ಬೀಡಿದ ಕುತ್ತಿನ್ ಒೈತ್‍ದ್ ಅಂಚಿ ದಕ್ಕ್‍ದ್ ಪಾರ್ ಪೋದು ಆ ಕುರಲ್ ಒೈಪಿನ ಪಾರೊಲುದ ಬೀಲೊಡು ಗಟ್ಟಿ ಪತೊನುವೆ. ಆ ಪಾರೊಲು ಪೋಡಿದ್ ಸೀದಾ ಬಲಿಪೆರೆ ಸುರು ಮಲ್ಪುಂಡು. ಆಂಡಲಾ ಐತ ಬೀಲೊದ ಕೊಡಿನ್ ಕೈ ಬುಡಂದೆ ಆ ಪಾರೊಲುದ ಪಿರವುಡೆ ಬಲಿಪುವೆ ಪಂದು.
ಆ ಪಾರೊಲು ಬಲಿತ್ ಬಲಿತ್‍ದ್ ಎದುರುಡಿತ್ತಿನ ಅಂಗಾರೆ ಕಡಪುದ ಸುದೆತ್ತ ನೀರ್‍ಗ್ ಲಾಗಿವುಂಡು. ಪಂದುನ ಕೈಟ್ ಪಾರೊಲುದ ಬೀಲ ಇತ್ತಿಲೆಕನ ಒಂಜಿ ಮಣಿಗಂಟೆ ಉದ್ಭವ ಆಪುಂಡು. ಕೈಟ್ ಇತ್ತಿನ ಗಂಟೆನ್ ಪಂದು ಅಚ್ಚರಿಡ್ ತೊವೊಂದಿತ್ತಿ ಲೆಕಾನೆ ಪಾರೊಲು ಸುದೆತ್ತ ನೀರ್‍ಡ್ ಮಾಯಕ ಆಪುಂಡು. ಪಂದು ರೋಮಾಂಚನೊಡು ಒರ ಬೆಗರ್ ಜಪುಡಾದ್ ಬೆರಗಾದ್ ಪೋಪೆ. ಅಚ್ಚರಿಡ್ ಉಂದು ದಾದ ಸೋಜಿಗ ದೇವೆರೆ ಪಂದ್ ಕಣ್ಣ್‍ಡ್ ಕಣ ನೀರ್ ಜಪುಡಾಬೆ. ಈ ಮಣಿಗಂಟೆನ್ ಬಾರಿ ಭಯ ಭಗ್ತಿಡ್ ಪತೊಂದು ಬತ್ತ್‍ದ್ ಉಂದೆನ್ ಯಾನ್ ಎನ್ನ ಇಲ್ಲ್ ಪೊಗ್ಗಯೆಂಡ ಸೂತಕ ಆಪುಂಡು ಪಂದ್ ಒಂಜಿ ಬರೆತ್ತ ಬರಿಟ್ಟ್ ಒಂಜಿ ಕುಡೆ ತೋಡುದು ಆ ಕುಡೆಟ್ಟ್ ದೀದ್ ಇಲ್ಲಗ್ ಪೋಪೆ ಇಲ್ಲಗ್ ಪೋಯಿನಾಯೆ ಮೈಕೈ ದೆಕ್ಕೊಂದು ತನ್ಕ್ ಮಧ್ಯಾಹ್ನ ರಾತ್ರೆಡ್ ಉನಿಯೆರೆ ನುಪ್ಪು ಪಾಡುನ ದನಿಕ್ಲೆ ಬುಡೇದಿ ಇನಿಲಾ ನುಪ್ಪು ಕಜಿಪುನು ಇರೆಟ್ಟ್ ಪಾಡ್ದ್ ಕಟ್ಟ್‍ದ್ ಕೊರ್ನಗ ಬೈದುಲೆ.. ಇನಿ ಎಂಕೊಂಜಿ ತುಡರ್ ಕೊರೊಡು ಪಂದ್ ಕೇನುವೆ. ಆ ಬಿರ್ಮಣ ಬೈದನ ಬುಡೇದಿ ಒಂಜಿ ಮಣ್ಣ್‍ದ ತಿಬಿಲೊಡು ಒಂಜಿ ಬತ್ತಿ ಪಾಡ್ದ್ ತುಡರ್ ಮಲ್ತ್‍ದ್ ಕೊರ್ಪೆರ್. ಪಂದು ತನ್ಕ್ ಕೊರಿನ ವನಸ್ಸ್‍ನ್ ಈ ಮಣಿಗಂಟೆ ಇತ್ತಿನ ಕುಡೆಟ್ಟ್ ದೀದ್ ತುಡರ್‍ನ್ಲಾ ಅಲ್ಪ ದೀದ್ ಭಯ ಭಗ್ತಿಡ್ ಕೈ ಮುಗಿದ್ ಅಲ್ಪ ಅಡ್ಡ ಬೂರ್ದು ಬೊಕ್ಕ ಆ ವನಸ್ಸ್‍ನ್ ತನ್ನ ಇಲ್ಲಗ್ ಕೊನೊದು ತನ್ನ ಬುಡೇದಿ ಜೋಕ್ಲೆ ನಡುಟು ಕುಲ್ಲುದು ಉನಿಯೆರೆ ಸುರು ಮಲ್ಪುವೆ. ಉಂದು ಇಂಚಾನೆ ಒಂಜಾತ್ ದಿನ ನಡತೊಂದಿಪ್ಪುನಗ ಈ ಸುದ್ಧಿ ಬಿರ್ಮಣ ಬೈದೆರೆ ಕೆಬಿಕ್ಕ್‍ಲಾ ಬೂರುಂಡು. ಉಂದೆನ್ ಇಂಚನೆ ಬುಡುಂಡ ಆವಂದ್. ಎನ್ನ ಒಕ್ಕೆಲ್‍ದಾಯಗ್ ಎನ್ನ ಭೂಮಿಡ್ ತಿಕ್ಕಿನ ಸೊತ್ತು ಅವು ಎಂಕ್ ಸಂದೊಡಾಯಿನವು. ಪಂದ್ ಕುಡೆಟಿತ್ತಿನ ಮಣಿಗಂಟೆನ್ ಬಾರೀ ಗಾಂಡ್ ಗೌಜಿಡೆ ಬ್ಯಾಂಡ್ ವಾದ್ಯೊಡು ತನ್ನ ಇಲ್ಲದ ಮಣಿ ಮಂಚಾವುಡು ದೀಪವೆರ್. ಬಲ್ಯಾಯಡ ಪ್ರಶ್ನೆ ಕೇನನಗ ಉಂದು ತನ್ನ ಬೆಪ್ಪು ಲೆಪ್ಪುಗು ಎನ್ನ ಪಿರವುಡೆ ಬೈದಿನ ದೈವಲಾ ಅಂದ್ ಪಂದ್ ತೆರಿದ್ ಬತ್ತಿನೆಡ್ದಾವರ ಬಿರ್ಮಣ ಬೈದೆರ್ ದುಂಬುಗು ಈ ದೈವೊಗು “ಕುಡೆ ಮಣಿ” ದೈವ ಪಂದ್, ಪುದರ್ ದೀದ್ ಕಾಲ ಕಾಲೊಗು ಬಲಿ ಬೋಗ ನೇಮ ನೆರಿ ಮಲ್ಪಾವೊಂದು ಬತ್ತೆರ್.
ದುಂಬುಗು ಗುಂಡೀರ ಕೊಡಂಗೆ ಬರ್ಕೆದ ಪುದರ್ “ಕೊಡಮಣಿ ಬರ್ಕೆ” ಪಂದ್ ಪುರುಪ್ಪು ಪಡೆವುಂಡು.
ಧರ್ಮೊದ ನಿಲೆಟ್ಟ್ ಸತ್ಯೊದ ತುಡರ್ ಬೆಳಗಾದ್ ಈ ತುಳುನಾಡ್‍ಡ್ ಮೆರೆದ್ ಕಾಯ ಬುಡ್ದು ಮಾಯ ಸಂದಿನ ಕೋಟೆ ಚೆನ್ನಯೆರ್ ಒಂಜಿದಿನ ಬ್ರಹ್ಮ ದೇವೆರೆ ಕೈತಡೆ ಪೋಪೆರ್‍ಗೆ. ಬ್ರಹ್ಮ ದೇವೆರೆನ್ ತೂದು ಅಡ್ಡ ಬೂರಿನ ಕೋಟಿ ಚೆನ್ನಯರೆನ್ ಬ್ರಹ್ಮ ದೇವೆರ್ ಬಾರಿ ಕೊಂಡಾಟೊಡೆ ಎದ್ಕೊನುವೆರ್. ಬತ್ತಿನ ಕಜ್ಜ ಕಾರ್ಯ ದಾನೆ ಜೋಕ್ಲೆ ಪಂದ್ ಕೇನುವೆರ್. ದೇವೆರೆ.. ಎಂಕ್ಲೆ ಅಪ್ಪೆ ಸುವರ್ಣ ಕೇದಿಗೆ ಮಾಯೊದ ಮಗಳ್ ಅಂಚಿಂತ್ತಿ ಮಾಯೊದ ಅಪ್ಪೆನ ಬಂಜಿಡ್ ಎಂಕ್ಲೆನ್ ಉಂಡು ಮಲ್ತರ್. ಎಂಕ್ಲೆಗ್ ಅಲ್ಪ ಆಯಿಸ ಕೊರ್ದು ಕಾಯ ಬುಡ್ದು ಮಾಯಲೋಕ ಸಂದುಲೆಕ ಮಲ್ತರ್. ಇನಿ ಎಂಕ್ಲೆ ಆತ್ಮೊಗು ಮೋಕ್ಷ ಇಜ್ಜಾಂದೆ. ನಿಲೆ ಇಜ್ಜಾಂದೆ ಎಂಕ್ಲು ಅಲೆಪ್ಪಿಲೆಕಾತ್‍ಂಡ್ ದೇವೆರೆ… ಎಂಕ್ಲು ತುಳುನಾಡ್‍ಡ್ ಪ್ರೇತೊಳಾದ್ ಮೆರೆವೊಡೆ. ಅತ್ತ್ ದೈವೊಳಾದ್ ಮೆರೆವೊಡೆ. ಅತ್ತ್ ಎಂಕ್ಲೆಗ್ ದೇವಲೋಕೊಡೇ ಸ್ಥಾನಮಾನ ಕೊರುವರೆ… ಪಂದ್ ಕೋಟಿ ಚೆನ್ನಯೆರ್ ಕೇನ್ನಗ

ಬ್ರಹ್ಮ ದೇವೆರ್: ಎನ್ನಮಾಯೊದ ಮಗಳ್ ಸುವರ್ಣ ಕೇದಿಗೆನ ಜೋಕುಲೆ… ನಿಕ್ಲೆಗ್ ನಿಕ್ಲೆ ಅಪ್ಪೆಗ್ ಅಲ್ಪ ಆಯಿಸ ಕೊರಿಯೆ ಪಂದ್ ಎತೆ ಮಲ್ಪಡೆ, ಉಂದು ಕಡೆಕಾಲ ಕಲ್ಜಿಗೊದ ನಿಯಮ. ನಿಕ್ಲೆಗ್ ಆತ್ಮೊಗು ಮೋಕ್ಷ ತಿಕ್ಕಂದೆ ಒಲ್ಪಲಾ ನಿಲೆ ಊರಿಯೆರೆ ಆವಂದೆ ಇಡೆ ಮುಟ್ಟ ಎನನ್ ನಾಡೊಂದು ಬತ್ತರಾ ಜೋಕುಲೆ.. ನಿಕ್ಲೆಗ್ ಯಾನ್ ಸಾದಿ ತೋಜವೆ ಜೋಕುಲೆ. ನಿಕುಲು ಚಂದುಗಿಡಿ ಪನ್ಪಿ ಒರಿ ದುಷ್ಟ ಮಾನಿನ್ ಕೆರ್ತಿನ ದೋಷ ನಿಕ್ಲೆ ಜನ್ಮೊದ ಆತ್ಮೊಡು ನನಲಾ ಕಲೆಯಾದೆ ಒರಿದ್‍ಂಡ್ ಜೋಕುಲೆ. ನಿಕುಲು ಈ ಭೂ ಲೋಕೊಗು ಪೋದು ಕಾಶಿ ತುದೆಟ್ಟ್ ಮೀದ್ ಸುದ್ದ ಮುದ್ರಿಕೆಡ್ ಲಕ್ಕ್‍ದ್ ಉಂತುದು ಎನನ್ ಪ್ರಾರ್ಥನೆ ಮಲ್ಪುಲೆ ನಿಕ್ಲೆ ದೋಷೊನು ಯಾನ್ ಪರಿಹಾರ ಮಲ್ಪುವೆ.
ನಿಕ್ಲೆಗ್ ಸಾದಿ ತೋಜಯೆರೆ ಒರಿ “ಕೊಡಮಣಿ” ದೈವೊನುಲಾ ನಿಕ್ಲೆಡಪ್ಪ ಕಡಪುಡ್ದು ಕೊರ್ಪೆ. ದುಂಬುಗು ನಿಕುಲು ದೇವೆರೆಡ್ದ್ ತಿರ್ತ್ ದೈವೊಲೆಡ್ದ್ ಮಿತ್ತ್‍ದ ಸಗ್ತಿಲು ಆದ್ ತುಳುನಾಡ್‍ಡ್ ಒಲ್ಪ ನಿಕ್ಲೆಗ್ ನಿಲೆಯಾಯೆರೆ ಮನಸ್ಸಾಪುಂಡಾ ಅಲ್ಪ ನಿಲೆಯಾದ್ ತುಳುನಾಡ್‍ದ ಜನೊಕ್ಲೆಗ್ ಬೆರಿಸಾಯ ಅದ್ ಉಂತುದು ಬುಳೆಸಿರಿ ಕಂಜಿ ಕಯಿಕಂಜಿಲೆಗ್ ರಕ್ಷಣೆದ ಬೇಲಿಯಾದ್ ಉಂತುದು ಮೆರೆಲೆ.
ಕೊಡಮಣಿ ದೈವೊನು ಲೆತ್ತ್‍ದ್ ಇಂದಾ.. ನಿಕ್ಲು ತುಳುನಾಡ್‍ಡ್ ನೆಲೆಯಾಪಿನಲ್ಪ ಈ ಕೊಡಮಣಿತ್ತಾಯಗ್ಲಾ ಒಂಜಿ ಸ್ಥಾನಮಾನ ಕೊರೊಡು ಪಂದ್ ಕೋಟಿ ಚೆನ್ನಯೆರೆನ್ ಬ್ರಹ್ಮ ದೇವೆರೆ ಆಶೀರ್ವಾದ ಮಲ್ತ್‍ದ್ ಕೊಡಮಣಿ ದೈವೊದ ಒಟ್ಟಿಗೆ ಕಾಶಿ ತೀರ್ಥ ಕ್ಷೇತ್ರೊಗು ಕಡಪುಡ್ದು ಕೊರ್ಪೆರ್. ಬ್ರಹ್ಮ ದೇವೆರೆಡ್ದ್ ಬ್ರಹ್ಮತ್ವ ಪಡಯಿನ ಕೋಟಿ ಚೆನ್ನಯೆರ್ ಇನಿ ತುಳುನಾಡ್‍ದ ಒರ್ಮೆಲಾ ಗರೋಡಿ ಕಟ್ಟಾದ್ ನಂಬಿ ನಕ್ಲೆಗ್ ಇಂಬು ಕೊರೊಂದು ಸತ್ಯೊನು ಗೆಂದಾದ್ ಕೊರೊಂದು “ಕೊಡಮಣಿತ್ತಾಯ” ದೈವೊನು ತನ್ನ ಎಡ ಭಾಗೊಡು ಉಂತಾವೊಂದು ಮೆರೆಪಿನಕ್ಲೆ ಬ್ರಹ್ಮ ಬೈದೆರ್ ಕೋಟಿ ಚೆನ್ನಯೆರ್.
ಇನಿ ಕೊಡಮಣಿತ್ತಾಯೆ ಮಹಾ ಮಲ್ಲ ರಾಜನ್ ದೈವ ಆದ್ ತುಳುನಾಡ್‍ದ ಪಡ್ಯಾರಬೆಟ್ಟು ಮಾರೂರು ಬಿರ್ನೊಟ್ಟುಗುಡ್ಡೆ, ಬರಾಯ ಚಾವಡಿ, ಅರುವ ಚಾವಡಿ, ಗುರುಪುರ ಬೈಲ ಬೂಡು, ಪೆರಿಂಜ ಲಾಡಿ, ತಿಬಾರ್. ಇಂಚಿತ್ತಿ ನೂತ್ತ ಆಜಿ ಕ್ಷೇತ್ರೊಡು ಮೆರೆವೊಂದು ತುಳುನಾಡ್‍ದ ಮಾತಾ ಕೋಟಿ ಚೆನ್ನಯೆರ್ನ ಗರೋಡಿಡ್ಲಾ ಮಲ್ಲ ಸ್ಥಾನ ಪಡೆವೊಂದು ತನ್ನ ಕಲೆ ಕಾರ್ಣಿಕೊನು ತೋಜಾವೊಂದು ಮೆರೆಪಿನ ದೈವನೆ ಕೊಡಮಣಿತ್ತಾಯೆ.